Национальнай библиотекаҕа татаар литературатын уонна култууратын киинэ арылынна

Кииҥҥэ Татарстан историятыгар, мэҥэ бэлиэлэригэр, култууратыгар уонна үгэстэригэр аналлаах кинигэлэр бааллар. Көрдөрүүгэ турар татаар тылынан суруллубут оҕо кинигэлэрин «Детская точка кипения» оҕо ааҕар киинигэр биэриэхтэрэ.

«Татаар литературатын уонна култууратын киинин арыйыы сүрүн сыала – бырааттыы норуоттарбытын бэйэ-бэйэтигэр чугаһатыы. Киин үүнэр көлүөнэни патриотическай тыыҥҥа иитиигэ туһуланыаҕа, ол курдук, оҕолорбут атын национальнай өрөспүүбүлүкэҕэ олорор саастыылаахтарын кытта доҕордоһор наадатын өйдүөхтээхтэр. Манна мэлдьи үлэлиэхтээх быыстапкабытын тэрийэри өйөөбүттэргэ махталбын тиэрдэбин», — диэтэ «Туган як» Татаар култууратын киинин бэрэссэдээтэлэ Игорь Халилов.

Бырайыак «Национально-культурное объединение якутов Республики Татарстан» уопсастыбаннай тэрилтэ көҕүлээһининэн, Татарстан Национальнай библиотекатын, СӨ Култуураҕа уонна духуобунай сайдыыга, итиэннэ Тас сибээстэргэ уонна норуоттар дьыаларыгар министиэристибэлэрин көмөлөрүнэн олоххо киирдэ.