Музыка үрдүкү оскуолатын саҥа дьиэтэ 2026 сылга үлэҕэ киириэҕэ

Музыка үрдүкү оскуолатын иккис уочаратын тутуу Өрөспүүбүлүкэ күнүгэр, муус устар 27 күнүгэр, саҕаламмыта. Дойду баһылыга Владимир Путин сорудаҕынан тутуу 2026 сылга түмүктэниэхтээх.
Оскуола саҥа дьиэтин бастакы сыбаайатын ууруу үөрүүлээх түгэнигэр Ил Дархан Айсен Николаев дойду баһылыга Владимир Владимирович Путин 1999 сыллаахха Саха сиригэр кэлэ сылдьан Музыка үрдүкү оскуолатыгар ыалдьыттаабытын, оҕолор классическай музыка айымньыларын толорбуттарын истиҥник ахтарын бэлиэтээтэ. Бу күн иитиллээччилэр ааттарыттан София Папоян уонна Айсен Местников дойду уонна өрөспүүбүлүкэ баһылыктара Владимир Путиҥҥа уонна Айсен Николаевка махталларын биллэрдилэр.

Оскуола дириэктэрэ Надежда Зайкова бэлиэтээбитинэн, кэлэктиип, төрөппүттэр, бэтэрээннэр уонна урукку, билиҥҥи үөрэнээччилэр, музыканы үчүгэй акустикалаах саалаҕа истэр сыалтан, Музыка оскуолатын таһынан Олоҥҥо киинэ үлэҕэ киириитин күүтэллэр.
Санатар буоллахха, Музыка үрдүкү оскуолатын саҥа дьиэтэ үс этээстээх, 9,5 тыһыынча кв/м иэннээх буолуоҕа. Манна 240 миэстээх үөрэнэр куорпус уонна 150 миэстэлээх интэринээт, кэнсиэртиир саала, библиотека, звукозапись устуудьуйата, фонотека кабинеттара итиэннэ оонньуур уонна спордунан дьарыктанар балаһааккалар киирэллэр.

Оттон Музыка үрдүкү оскуолата Саха сиригэр 1993 сыллаахха Бастакы Бэрэсидьиэн Михаил Ефимович Николаев көҕүлээһининэн тэриллибитэ. Манна бүгүн 7-тэн 18-гар диэри саастаах 174 оҕо уопсай уонна орто анал, 103 устудьуон үрдүк үөрэххэ үөрэнэллэр, диэн иһитиннэрэр Ил Дархан уонна Бырабыыталыстыба пресс-сулууспата. Андрей Сроокин, СИА, хаартыскаҕа түһэриитэ.