Музыка – бука барыбытыгар

Дьокуускайга бэс ыйын 27 күнүттэн IV Норуоттар икки ардыларынааҕы “Музыка – бука барыбытыгар”: Арассыыйа музыкальнай үөрэхтээһинин феномена” диэн кэнгириэс атыыр мунньаҕынан саҕаланна. Тэрээһиннэр от ыйын 2 күнүгэр диэри ыытыллыахтара.

Саха сиригэр “Музыка – бука барыбытыгар” бырайыагы бастакы бэрэсидьиэммит Михаил Николаев көҕүлээбитэ. Арассыыйаҕа маныаха майгынныыр  «Рисуем все», «Шахматы для всех» бырайыактар үлэлииллэр.

Музыканы киэҥ эйгэҕэ тарҕатар бырыайыак биһиэхэ хас да түһүмэҕинэн олоххо киирдэ. 2013-2014 сылларга нормативнай быраап базата олохтоммут эбит буоллаҕына, 2014-2020 сылларга музыкальнай үөрэхтээһин ыраах сытар да улууска тиийэрин тэрийии буолбута, оҕоҕо барытыгар тэҥ кыаҕы үөскэтиигэ күүскэ үлэ барбыта.

2020-2021 сс. үөрэх дьылын түмүгүнэн, Саха сиригэр  641 уопсай үөрэхтээһин оскуолата үлэлиир, онно 147 931 оҕо үөрэнэр. Музыка уруоктара 1-8 кылаастарга ыытыллаллар, 117 475 оҕо хабыллар – ол аата “Музыка – бука барыбытыгар” бырайыагынан оҕо 75,3 бырыһыана хабыллар.

802 уһуйааҥҥа 67 720 оҕо сылдьар, олортон 97 бырыһыаннара музыкальнай үөрэхтээһин бырайыагынан үөрэнэр.  

Эбии үөрэхтээһин тэрилтэлэригэр 47 473 оҕо музыкаҕа үөрэнэр.

Маны таһынан, Саха сиригэр 63 оҕо искусствотын оскуолата үлэлиир (67 филиал баар) – 16 457 оҕо музыканан дьарыктанар. 2021 сылга 925 оҕо бүтэрбититтэн, 81 выпускник музыканы идэ быһыытынан талбыт.

Кэнгириэс түмүгүнэн уопсастыбаннаска туйааһыы сурук тахсыаҕа. Оттон бэс ыйын 29 күнүттэн от ыйын 2 күнүгэр диэри “Саһарҕа хоптото” күөн күрэс ыытыллыаҕа.

Быйыл “Саһарҕа хоптото” күрэххэ хаһааҥҥытааҕар да элбэх сайаапка киирбит – 297 – бу 25 улуустан 1302 оҕо. 2019 сыллааха буолбут бастакы куонкуруска кыттааччылар үс номинацияҕа «Виолончель», «Музыка для всех» (кэллэктииптэр) уонна «Музыка для всех» (фортепиано) күрэхтэспит буоллахтарына, быйыл эбии үс номинация киирдэ - «Академическай ырыа», «Хор” уонна «Духовой инструменнар оркестрдара уонна ансаамбыллара».