Музейдар үлэлиэхтэрэ

От ыйын 7 күнүгэр Ярославскай аатынан музей үлэтин саҕалаата. Сеанстар сарсыарда 10 чаастан киэһэ 17.00 чааска диэри 20-лии мүнүүтэ буолуохтара. Роспотребнадзор ирдэбилинэн мааскалаах киирии булгуччулаах. Ону таһынан социальнай тэйиччи туттуу быраабылаларын тутуһаргытыгар көрдөһөллөр. Саалаларга киһи олус элбээтэҕинэ, күүттэриэхтэрин сөп. Музей көрөөччүлэргэ оптуорунньуктан баскыһыанньаҕа диэри аана аһаҕас.

Национальнай художественнай музей от ыйын 8 күнүттэн үлэтин сыыйа-баайа түһүмэҕинэн сөргүтүө. Сайыҥҥы эрэсииминэн, ол эбэтэр күнүс 12 чаастан киэһэ 20.00 чааска диэри ыалдьыттарын күүтэр. Киирэн иһээччилэр температураларын бэрэбиэркэлиэхтэрэ, ыарыыттан сэрэхтээх буолуу миэрэлэрин тутуһуохтара. Киин аанынан киирэн баран, тиэргэн таһынааҕы аанынан тахсаҕыт. 

От ыйын 14 күнүттэн “Россия – мин историям” историческай паарка аанын тэлэччи аһыаҕа. Манна үлэ эмиэ Роспотребнадзор ирдэбилинэн салаллыаҕа. Музей ыалдьыттарын оптуорунньуктан субуотаҕа диэри сарсыарда 10 чаастан киэһэ 19.00 чааска диэри ыҥырар. Баскыһыанньаҕа уонна бэнидиэнньиккэ – өрөбүл күннэр. Үлэ чааһа кэлин уларыйыаҕа.