Муус устар ыйга 13 тыһыынча киһи электричество уота суох хаалар кутталлаах

«Якутскэнергосбыт» ПАО иһитиннэрэринэн, бүгүҥҥү туругунан, электричество уотунунан туһаныыга нэһилиэнньэ иэһэ миллиардка чугаһаан турар – 985 мөл. солк. 
Ол курдук, кулун тутар ыйга 20 тыһыынча кэриҥэ киһиэхэ электричество уотун араарар туһунан иһитиннэрии, сэрэтии тарҕатыллыбыт. Муус устар ыйга иэстээхтэри кытта үлэ салҕаныаҕа, маныаха испииһэккэ 13 тыһыынча киһи баарыттан, 7,8 тыһыынчата – Дьокуускай куорат олохтооторо, диэн иһитиннэрэр өҥөнү оҥорор хампаанньа.  
Бу дьон иһитиннэрии туппуттара 20 күн иһигэр иэстэрин төлөөбөтөхтөрүнэ, өҥөнөн хааччыйар тэрилтэ хос сэрэтиитэ суох электричество уотун биэриини хааччахтыыр бырааптаах. Ол курдук, сокуон быһыытынан, энергетиктар өҥөнөн туһанааччы икки ыйтан ордук төлөбүр оҥорбот буоллаҕына, итинник миэрэни туттар, маны таһынан иэһи суутунан көрдүүр кыахтаахтар. 
Мантан сиэттэрэн, «Якутскэнергосбыт» хомунаалынай өҥө иһин иэс кыра да сууматын кэмигэр төлөөн иһэргэ ыҥырар. Төлөбүрү хампаанньа офистарыгар эбэтэр «ДЭК» ПАО онлайн-сервиһин нөҥүө оҥоруохха сөп.