Муус устар 24-30 күннэригэр иммунизация нэдиэлэтэ ыытыллар

Муус устар 24-30 күннэригэр Саха сиригэр «Вакцины работают» уонна «Вакцинация — это не только право, но и коллективная обязанность!» диэн луозуннардаах биир кэлим иммунизация нэдиэлэтэ ыытыллар. Бу туһунан Доруобуйа харыстабылын министиэристибэтин пресс-сулууспата иһитиннэрдэ. 
Нэдиэлэ устата хас биирдии гражданин учаастактааҕы бырааһыттан билиҥҥи кэмҥэ ханнык быһыыны ылыахтааҕын туһунан чуолкайдаһыахтаах. Медицинскэй үлэһиттэр киһини көрөн-истэн, интириэһиргиир ыйытыктарыгар хоруйдаан баран наадалаах вакцинаны туруораллар. 
Ротавируснай инфекцияны утары быһыыны кырачааннарга икки ыйдарыттан,  менингококковай инфекцияны утары 20 ыйдарыттан, коклюштан — алта-сэттэ саастарыттан, итини сэргэ пневмококковай инфекцияттан, ветряной оспаттан, А гепатиттан уонна да атын ыарыылартан быһыылары туруораллар. 2021 сылтан саҕалаан гражданнарга саҥа  коронавируснай инфекцияны утары быһыы оҥоһуллар.