23.02.2024 | 18:00

«Муус устар-2024»: Бииргэ кыайыахпыт!

Олунньу 17 күнүгэр Дьокуускайга «Муус устар-2024» ыччат бэстибээлин күүтүүлээх, уоттаах-күөстээх финала түмүктэннэ. Тэрээһиҥҥэ икки тыһыынчаттан тахса ыччат муһунна. Бэстибээл быйылгы сүрүн девиһэ: “Бииргэ кыайыахпыт!”.
«Муус устар-2024»: Бииргэ кыайыахпыт!
Ааптар: Уйгулана БОЧОНИНА
Бөлөххө киир

“Триумф” спорт киинигэр сарсыардаттан сүрүү-көтүү. Стадиоҥҥа киэһээҥҥи кэнсиэргэ бэлэмнэнии үгэнэ, оттон киирэр ааҥҥа номнуо волонтердар ыалдьыттары көрсөллөр. Бастакы ыалдьыттарга бэстибээл суумкатын бэлэх ууналлар, фотозоналарга хаартыскаҕа түһэрэллэр.

Алексей Никифоров, волонтер:

— Мин  “Муус устарга” волонтер быһыытынан номнуо төрдүс төгүлүн үлэлиибин. Волонтердар үлэлэрэ — кыттааччыларга, ыалдьыттарга туох ханна баарын, ыытылларын ыйан-кэрдэн, сирдээн биэрии, бэрээдэги кэтээһин. Манна барыта анал үөрэҕи, бэлэмнэниини ааспыт 100 кэриҥэ волонтер араас сыаллаах-соруктаах бөлөхтөргө арахсан үлэлиибит. Кимнээх эрэ көрөөччүлэргэ олорор миэстэлэрин ыйан биэрэллэр, билиэттэри бэрэбиэркэлииллэр, сорохтор гардеробка таҥас ыйыыллар.

Мин санаабар, бу бэстибээл, биллэн турар, олус наада. Тоҕо диэтэххэ Саха сиригэр олорор ыччаты сомоҕолуур, бэйэ-бэйэни кытта билсэргэ, билии-көрүү атастаһарга, уопут ыларга, бэйэни көрдөрөргө олус табыгастаах балаһаакка.

«Триумф» иккис этээһигэр 14 хайысханан корнердар үлэлии тураллар. Манна бэстибээл кыттыылаахтара уонна анал исписэлиистэр ыалдьыттарга оонньуу, маастар-кылаас ыыталлар, үлэлэрин туһунан кэпсииллэр.

Софья Адам, “Этно — мы” корнер ыытааччыта:

— Биһиги СӨ Ыччат ассамблеятын чилиэннэрэ араас омуктары билиһиннэрэбит: сахалар, эрмээннэр, нууччалар, таджиктар. "Этно — мы" диэн корнерга ыалдьыттарга остуол оонньууларын ыытабыт. Бэйэм бу бэстибээлгэ иккис төгүлүн кыттабын. Быйыл волонтёрдары тэрийии быдан тупсубутун, ону таһынан дьон интэриэһин тардар трек элбээбитин бэлиэтээтим.

Анисия Титова, ХИФУ устудьуоннарын этэрээттэрин штабын хамыһаара:

— Бу “Муус устар” бэстибээлгэ этэрээтинэн кытта сылдьабыт уонна Владимир Путин көҕүлээһининэн ыытыллар Устудьуоннар тутар этэрээттэрин күнүн бэлиэтээтибит.

Ону таһынан саҥа тэриллибит “Трудовые отряды подростков” куратора буолан, ыалдьыттарга бу хайысха туһунан сырдатабын. Бу этэрээккэ оскуола оҕолоро киирэн, устудьуоннар курдук сайыҥҥы сынньалаҥнарыгар бастакы үлэлэрин булар, хамнас аахсар кыахтаахтар.

“Муус устар” сыллата сайдан, тупсан иһэрэ наһаа үчүгэй, элбэх саҥа балаһаакка тэриллэр, саҥа хампаанньалар кыттыыны ылаллар. Уопсайынан, ыччат сайдарыгар наһаа туһалаах тэрээһин дии саныыбын. Биһигини кытта бииргэ буолуҥ!

Аян Третьяков, ыалдьыт:

— Мин бэстибээлгэ “Бэс Чагда” лааҕырга сылдьар этэрээппин кытта кэллим. Сөбүлээбит корнердарым: “Народный фронт”, «Дружинниктар» уонна “Медиаоскуола”. Бэйэм ыытааччы идэтигэр холонон көрдүм. “Муус устарга” аан бастакыбын сырыттым уонна кэлэр сылларга эмиэ кыттыахпын баҕардым.

Василий Терентьев, ыалдьыт:

— “Ситим” Бүлүү улууһун эдэр ыччатын түмсүүтүн актыбыыһа буолабын. “Муус устарга” быйыл саҥа кыттан, улахан дуоһуйууну ыллым, фотозоналара, корнердара наһаа астыктар. Уопсайынан, ураты эйгэлээх тэрээһин диэн көрдүм. Ордук «Саха» НКИХ көҕүлээһининэн ыытааччы идэтигэр холонон көрбүппүт сэҥээрдим уонна киириигэ бэлэх биэрбиттэриттэн соһуйдум. Ону таһынан биир дойдулаахтарым ГТО, суруналыыстыка, бизнес көрүҥнэригэр ситиһиилээхтик кыттыбыттарыттан үөрдүм.

Суотту орто оскуолатын 6-с кылааһын оҕолоро «Кэлэр кэм идэтин күнэ» диэн саҥа хайысхаҕа клубниканы үүннэрэргэ айбыт технологияларынан тэпилииссэ туппуттарын көрдөрөн, Гран-при аатын ылары ситистилэр.

Николай Котоконов, Суотту орто оскуолатын эбии үөрэхтээһиҥҥэ уһуйааччыта:

— Бырайыакпыт аата “Хотугу регионнарга сити-фермерство” диэн. Бу бырайыакпытынан “День профессий будущего” диэн трекка кыттан, гран-при буолбуппутуттан олус соһуйдубут уонна, биллэн турар, үөрдүбүт.

Биһиги агрооскуола буоламмыт, сити-фермерство, гидропоника өттүгэр былырыыҥҥыттан күүскэ ылсан үлэлии сылдьабыт. Тэхиньиичэскэй, биологическай, химическэй өттүн үөрэтэр анал кылаас арыйбыппыт уонна онно 216 клубника угун олордубуппут. Үүнээйилэрбитигэр автономнай установка оҥорон, Саха сиригэр хас биирдии дьиэҕэ клубника үүнүөн сөп диэн санааҕа кэлэн, үлэбитин бэстибээлгэ билиһиннэрдибит. Биһиги установкабыт сыанатынан да, оҥоһуутунан да удамыр, судургу буолан, ким баҕар оҥостуон сөп.

Финальнай шоу уратыта — биир сыанаҕа Арассыыйа уонна Саха сирин биллиилээх сулустарын сэргэ саҥа ааттар тахсыбыттара. Манна «Воплощай и вдохновляй!» трек кыттааччылара, финалистара уонна «КҮН», «СулуСТАР», «Хомус тэтимэ» айар күрэхтэр кыайыылаахтара талааннарын көрдөрдүлэр.

Биир соһуччу уонна умнуллубат түгэнинэн дойду үрдүнэн биллэриллибит Дьиэ кэргэн сылынан финальнай шоу кыттыылаахтара Алена Петрова уонна Николай Васильев икки тыһыынча көрөөччү иннигэр олохторун холбообуттара буолла.

Үгэс быһыытынан, «Муус устар» бэстибээлгэ «Бастыҥ ыччат оройуона» анал номинация кыайыылаахтарын ааттаатылар. Ол курдук, Арктика эргимтэтигэр Булуҥ оройуона бастаата, оттон өрөспүүбүлүкэ бастыҥ ыччаттаах улууһунан Горнай улууһа билиннэ.

Көхтөөх ыччат “Муус устарга” хаһыс да төгүлүн бэриммэккэ кыттар эбит. Кинилэр ортолоругар Мэҥэ Хаҥалас улууһуттан Владлена Павлова «Бастыҥ доброволец» номинация кыайыылааҕа:

— “Муус устарга” үсүһүн кыттабын уонна, “Туох барыта үһүстээх” диэбиккэ дылы, үһүспүн кэлэн кыайдым!

Кыра эрдэхпиттэн дьоҥҥо көмөлөһөрбүн сөбүлүүбүн. Эбээм быраас буолан, кинини батыһа сылдьан балыыһаҕа сытар ыарыһахтары, кырдьаҕас дьону көрсөн улааппытым. Уонна үөрэхпин бүтэрэн дойдубар төннүбүппэр, пандемия кэмэ буолан, аҕам саастаахтарбытын харыстаан, маҕаһыыҥҥа, аптекаҕа, балыыһаҕа сылдьан ыарыыга хаптарбатыннар диэн, Майа сэлиэнньэтин ыччаттара кинилэргэ аһы, эми-тому таһан көмөлөспүппүт. Билигин даҕаны кырдьаҕастарбытыгар илии-атах буолабыт. Ону таһынан култуурунай тэрээһиннэргэ волонтерскай хамсааһыммыт барытыгар кыттыыны ылар. 2023 сылга “Поезд Победы” түмэл Саха сиригэр аан маҥнай кэлбитигэр мин волонтердары салайбытым. “Кыайыы волонтердара” диэн 26 оҕо үс күнү быһа үлэлээн, 4000 тахса ыалдьыты көрсөн, түмэл туһунан кэпсээбиппит.

Бүгүҥҥү бэстибээли олус астынным, сылтан сыл тупсан, ыччат сайдар хайысхалара элбээн иһэрэ хайҕаллаах. Онон Ил Дархаммыт Айсен Сергеевич Николаевка, “Муус устар” тэрийээччилэригэр, волонтер ыччаттарга махталбын тиэрдэбин. Сахабыт сиригэр элбэх волонтер баар буоллун, аһыныгас сүрэхтээх, үтүө санаалаах ыччат элбии турдун!

Бэстибээл ыалдьыттарынан блогер уонна ырыаһыт Esmi, Дарья Билько, музыкант Chris Yank, гимнастка Лилия Ахимова, олимпийскай оонньуулар икки төгүллээх призердара Евгения Тарасова уонна Владимир Морозов, военкордар Семен Пегов уонна Руслан Гусаров буоллулар. Оттон бэстибээл сүрүн хедлайнера — ырыаһыт Хабиб “Ягода малинка” хит ырыатын толорон, “Муус устар” үөрүүлээх сабыллыытын киэргэттэ.

Хаартыскалар: "Муус Устар-2024" Медиакиинэ

Сонуннар

Ордук ааҕаллар

Замполит Александр:  «Эр санаалаах боотурдары төрөтөр Саха сиригэр сүгүрүйэбин»
Дьон | 12.07.2024 | 12:00
Замполит Александр: «Эр санаалаах боотурдары төрөтөр Саха сиригэр сүгүрүйэбин»
Бу сурук кэлбитин туһунан миэхэ Уус Алдан улууһун социальнай политика салаатын үлэһитэ, хаһыаппар сырдаппыт, анал байыаннай дьайыы саҕаланыаҕыттан үлэлии сылдьар Наталья Охлопкова от ыйын 3 күнүгэр эрийэн, хаһыаккар таһаарыаҥ дуо диэбитин тута сөбүлэспитим. Онон, сурук хайдах баарынан тылбаастаан, ааҕааччыларбар тиэрдиэм, Саха сирэ дьоруойдарын билиэхтээх!   “Наталья, дорообо! Мин аатым Александр. Мин...
Истиҥник санаан
Дьон | 05.07.2024 | 20:38
Истиҥник санаан
(Учууталбар Раиса Реасовна Кулаковскаяҕа ананар)
Светлана Дьяконова: «Саҥаттан ыал буолан эрэр курдукпут...»
Дьон | 04.07.2024 | 16:00
Светлана Дьяконова: «Саҥаттан ыал буолан эрэр курдукпут...»
Быйылгы халаан Хатырык нэһилиэнньэлээх пуунун олох үөйбэтэх өттүттэн ылан, олохтоохтору ууга-уокка түһэрбитин ааһан, уйулҕаларыгар да охсуу ыллылар, күн бүгүн ол содулун туоратыыга күүскэ үлэлииллэр, кэлэн ааспыт иэдээни оһоруналлар.   Светлана Васильевна Дьяконова, Хатырык олохтооҕо, биэнсийэлээх, култуура эйгэтигэр 35 сыл үлэлээн, “Култуура туйгуна” бэлиэлээх үлэ бэтэрээнэ, бүгүн ааҕааччыларга халаан иэдээнин туһунан кэпсиир:...
Туймаада ыһыаҕын туһунан дьон санаата
Сонуннар | 04.07.2024 | 14:00
Туймаада ыһыаҕын туһунан дьон санаата
Туймаада ыһыаҕа ыһыллар Үс Хатыҥ сирэ-уота куорат кииниттэн төһө да ыраах турдар, норуот уустук айаны, араас мэһэйдэри аахсыбакка, бииргэ мустар үөрүүтүн билээри, алгыс баһын сыалаары, кэлэр сылга күүс эбинээри, быйыл номнуо үйэ чиэппэриттэн ордук саараабакка дьулуһар. Быйылгы ыһыах тэрээһинин туһунан норуот санаатын билсээри, ыйынньыктарынан сирдэтэн, түһүлгэлэринэн хаамтыбыт.   Бастатан туран, оптуобус....