Муус уонна хаар оҥоһуктар күрэхтэрэ саҕаланна

Быйылгы куонкуруска Арассыыйа регионнарын, итиэннэ Монголия уонна Кытай бэрэстэбиитэллэрэ кытталлар.

Орджоникидзе болуоссатыгар кыттааччылар сэлэлии хаамсыахтара, ол кэнниттэн «Азия оҕолоро» VIII-с Норуоттар икки ардыларынааҕы спортивнай оонньууларга анаммыт муус оҥоһуктар блиц-турнирдара ыытыллыаҕа.

Сүрүн куонкурус, үгэс быһыытынан, 202-с дьоҕус оройуон муус пааркатыгар тэриллэр. Былааҥҥа олоҕуран, сэтинньи 28-30 күннэригэр муус оҥоһуктар, оттон ахсынньы 1-3 күннэригэр – хаар оҥоһуктар күрэхтэрэ ыытыллыаҕа. Кыттааччылар үлэлиир кэмнэрэ – сарсыарда 9 чаастан 19 чааска диэри.

Дьүүллүүр сүбэҕэ идэтийбит худуоһунньуктар уонна скульптордар, Арассыыйа уонна Саха сирин Худуоһунньуктарын сойууһун чилиэннэрэ, ону сэргэ Харбиннааҕы Муус оҥоһуктар норуоттар икки ардыларынааҕы күрэхтэрин эксперт-судьуйата, Хэйлунцзян провинциятын Муус гравюраҕа академиятын вице-бэрэсидьиэнэ Чжэн Цзиньнань бааллар.