Муммут дьону буллулар

Быыһааччылар дьуһуурунай симиэнэлэрэ тута миэстэтигэр тиийбит. Быыһыыр сулууспа суһал дьоһуурунайа муммут дьоннуун сибээскэ сылдьан, сири-уоту ойуулаан көрдөрбүттэригэр олоҕуран, муммут дьон баар буолуон сөптөөх тыаларыгар быыһааччылары ыйан ыыппыт.

Быыһыыр сулууспа симиэнэтин салайааччыта Александр Мостахов иһитиннэрбитинэн, тэллэйдьиттэри – муммут дьахтары уонна эр киһини түүн булбуттар.

«Ойуурга бараргытыгар толору ииттэриилээх мобильнай төлөпүөҥҥүтүн илдьэ сылдьыҥ. Бэҕэһээҥҥи түбэлтэҕэ суотабай сибээс баар буолан көрдөөһүн үлэтэ түргэтээтэ. Халлаан туругунан сирдэтэн таҥныҥ, ордук киһи хараҕар быраҕыллар, от-мас быыһыгар көстөр чаҕылхай өҥнөөх таҥастаах сылдьыҥ. Чугас дьоҥҥутугар, аймахтаргытыгар хайа диэки барбыккытын, хаһан кэлэргит туһунан сэрэтэн баран айылҕаҕа тахсыҥ. Мунан хааллаххытына биир сиргэ туран күүтүҥ», - диэн сүбэлээтэ быыһааччы.

Суһал сулууспаны ыҥырар нүөмэр – 112, СӨ Быыһыыр сулууспатын суһал дьоһуурунайын нүөмэрэ – (411) 45-90-19.