Можайскай уулуссата түөрт балаһалаах буолар

Можайскай уулуссатыгар «Хаачыстыбалаах уонна куттала суох суоллар» нацбырайыагынан былырыыҥҥыттан киэҥ хабааннаах өрөмүөн ыытыллар. Ол курдук, суолу түөрт балаһаҕа диэри кэҥэтэллэр.
Муус устар 20 күнүгэр баһылык Евгений Григорьев үлэ хаамыытын билистэ. «Былырыын «Белое озеро» ырыынактан ГАИ поһугар диэри аспаалламмыта. Бэдэрээтчит «Дороги Саха» АУо бу күннэргэ уу ааһар ситимин тардар, 2 км 400 м усталаах бетон халдьалары оҥоруунан дьарыктанар. ГАИ поһун кэнниттэн эргиир суол тутуллуохтаах. Ыам ыйын бастакы аҥаарыгар итиннэ аспаал ууруута саҕаланыаҕа», - диир Евгений Григорьев.
Маны сэргэ «Азия оҕолоро» НИСО көрсө быстах өрөмүөн ыытыллара былааннанар, диэн иһитиннэрэр Олохтоох дьаһалта пресс-сулууспата.