Москваҕа Кыайыы параадын көһөрдүлэр

Улуу Кыайыы 75 сылыгар, Москваҕа Кыһыл болуоссакка ыытыллыахтаах, Байыаннай параады тохтоттулар. Ол туһунан муус устар 16 күнүгэр дойду бэрэсидьиэнэ В.В.Путин Куттал суох буолуутун Сэбиэтин мунньаҕар иһитиннэрдэ.

Кыайыы күнүн чэрчитинэн ыытыллыахтаах маассабай тэрээһиннэр бары тохтоотулар. Биричиинэтэ биир – Арассыыйаҕа эпидемия муҥутуур чыпчаалыгар тиийэ илик.

Бэрэсидьиэн этэринэн, Кыайыы параада, “Бессмертный полк” сэлэлии хаамыыта уонна да атын тэрээһиннэр атын даатаҕа көһөрүллэн, быйыл хайаан да ыытыллыахтара.

Бу иннинэ, экспертэр сабаҕалааһыннарынан, Кыайыы параада балаҕан ыйыгар, Аҕа дойду улуу сэриитин бүппүт даататыгар, көһүөн сөп диэбиттэрэ. Эбэтэр,  ыам ыйыгар параат буолар түгэнигэр, көрөөччүлэрэ суох ааһыаҕа диэн суруйбуттара. Сорохтор Кыайыы параадын сэтинньи саҥатыгар буолуо диэн суруйаллар.