Моруос Оҕонньор уонна Хаарчаана сыаналара

Дьокуускайга Моруос Оҕонньору уонна Хаарчаананы ыҥыран эҕэрдэлэтии сыаната былырыыҥҥытааҕар улаханнык уларыйбатах. Арай, биллэриилэри үөрэтэн уонна инстаграмы ырытан көрдөххө, ахсааннара биллэ эбиллибитэ харахха тута быраҕыллар.

Ахсынньы 20-29 күннэригэр алыптаах Саҥа дьыл сүрүн дьоруойдарын ыҥырыы ортотунан 2500 солкуобайтан саҕаланар. Моруос Оҕонньор уонна Хаарчаана эҕэрдэлэрин сыаната ахсынньы 29 күнүгэр эрэ диэри арыый удамыр буолар. 30 чыыһылаттан 1000 солкуобайынан ыарыыр. Тохсунньу 2 күнүттэн Эргэ Саҥа Дьылга диэри өссө 1000 солк. эбиллэр эбит.

Моруос Оҕонньор Хаарчаананы кытта кэлэн эҕэрдэлиирэ, оҕоттон биир хоһоон истэрэ (хороводтууллара – туспа кэпсэтиинэн) быһа холуйан 15-20 мүнүүтэ устата буолар. Ити үөһээ ыйыллыбыт сыаналар бары 15 мүнүүтэлээх эҕэрдэҕэ суоттаммыттар.

30 мүнүүтэлээх эбэтэр 1 чаастаах эҕэрдэҕэ суруллубукка эбии туох эмэ көрдөөх оонньуу эбиллэр эбэтэр сюжеттаах оонньуу буолар. Сыаната, биллэн турар, икки бүк эбиллэр.

Аниматордар кэлэн оҕолору оонньотор сыаналара саҥа дьыл саҕана ортотунан 5000-8000 солк. саҕаланар. Тиэмэтин, дьоруойдарын, остуоруйаны сакаасчыт бэйэтэ талар. Билиҥҥи оҕолорго “Игра в кальмара” сериал ис хоһоонунан барар оонньуулар былдьаһык буолбуттар, онон кинилэргэ эрдэттэн сурутуу барар эбит.

Куорат кытыытыгар, ыраах олорооччуларга сыанатыгар эбии 500-1000 солк. эбэллэр.

Тэрилтэлэргэ корпоративтар үгүстэригэр бобулуннулар, оҕо уһуйааннарыгар төрөппүтэ суох утренниктар буолаллар, онон туораттан Моруос Оҕонньору уонна Хаарчаананы сакаастыыллара тохтоото, кинилэри вакциналаах төрөппүттэр солбуйарга күһэлиннилэр.

***

Билиҥҥи оҕо үксэ суотабайдаах эбэтэр төрөппүттэрин төлөпүөнүн баһылыыр, онон билэр дьоҥҥутугар сөҥ соҕус куоластаах эр киһини  булан төлөпүөҥҥэ эриттэриэххитин сөп. Тымныы Оҕонньоттор уонна Хаарчааналар оҕолору онлайн эҕэрдэлиир өҥөлөрө эмиэ баар буолбут.  Эҕэрдэлиир киһи, оҕону итэҕэтэр туһугар, бастаан  хайаан да кини ситиһиилэрин хайҕыахтаах, онтон баҕа санаатын этиэхтээх.

***

Сатаан ааҕар буолбут оҕоҕо Моруос Оҕонньор сурук суруйуон сөп. Оннук өҥөнү саха ыччата эмиэ баһылаабыт. Дьэрэкээн кэмбиэрдээх, оҕоҕут туһунан туох информацияны биэрэргитинэн сиэттэрэн суруллар аптаах суругу 150 солкуобайтан саҕаланар сыанаҕа суруйан биэрэр дьон инстаграмҥа бааллар.

***

Интэриниэккэ киэҥник тарҕаммыт роликтар бааллар. Онно оҕо аатын, сааһын, сөбүлүүр дьарыгын, киниэхэ тугу баҕараргытын суруйан биэрдэххитинэ, бэйэтигэр эрэ туһуламмыт эҕэрдэ буолан көстөр. Оҕоҕут чахчы сөҕүө-махтайыа. Оннук роликтар, холобур, https://newyear.mail.ru сайтка сыллата тахсаллар, наһаа үчүгэйдэр.