Мобилизацияламмыттар устудьуон оҕолоро өйөбүлүнэн туһаналлар

«Бүгүҥҥү күҥҥэ үрдүк уонна орто үөрэх кыһаларыгар үөрэнэр устудьуоннарга үрдэтиллибит истипиэндьийэни төлүүргэ 250 сайабылыанньа киирдэ, ол иһигэр 74 – үрдүк үөрэх кыһатын устудьуоннарыттан. Үрдээбит истипиэндьийэ кээмэйэ – 5 607 солкуобай. Итиэннэ тус сыаллаах үөрэх туһунан 102 дуогабар түһэрсилиннэ», – диэн иһитиннэрдэ миниистир.

Саха Өрөспүүбүлүкэтин Ил Дархана Айсен Николаев ыйааҕар олоҕуран, Үөрэҕирии уонна наука министиэристибэтэ устудьуоннары – анал байыаннай эпэрээссийэ оҕолорун өйүүргэ икки миэрэни олоххо киллэрэр. Онтон биирэ – тус сыаллаах үөрэххэ кинилэри кытта бастакы уочарат дуогабар түһэрсэр, иккиһэ – үрдүк уонна орто үөрэх кыһаларыгар үөрэнэр устудьуоннарга, үөрэххэ ситиһиилэриттэн тутулуга суох, үрдэтиллибит истипиэндьийэни төлүүр. Итини таһынан, тус сыаллаах үөрэҕи бүтэрбит эдэр исписэлиистэри регион территориятыгар баар тэрилтэлэргэ үлэҕэ киллэрэллэр.

Өйөбүл миэрэтин ыларга сайаапкалары МФЦ нөҥүө эбэтэр  электроннай көрүҥүнэн e-yakutia судаарыстыбаннай уонна муниципальнай өҥөлөр порталларын нөҥүө ыытыахха сөп.