Мобилизацияламмыт киһи сибээскэ тахсыбатаҕына

«Итии линия» регионнааҕы салаатын салайааччыта дьон үксэ анал байыаннай эпэрээссийэҕэ сылдьар аймахтарын сүтэрэн, долгуйан, хайдах сылдьарын билээри эрийэллэрин, итиэннэ бааһырбыт байыастарга уонна сулууспалаахтар дьиэ кэргэттэригэр көмөнү оҥоруу туһунан ыйыталларын бэлиэтээтэ.

Мария Винокурова байыаннай чааска сылдьан смартфону туттар, хаартыскаҕа түһэр уонна видеоҕа уһулар көҥүллэммэтин туһунан эттэ. Байыастар хамандыыр көҥүлүнэн кнопкалаах эбэтэр стационарнай төлөпүөнтэн анаммыт кэмҥэ эрэ эрийэн кэпсэтиэхтэрин сөп.

«Итии линия» салайааччыта быһаарбытынан, мобилизацияламмыт киһи ханна, хайдах сылдьарын туһунан информацияны Оборона министиэристибэтин үлэһитэ чугас аймахтарыгар эрэ биэрэр бырааптаах. Бу ый саҥатыгар биир байыас ийэтэ уонна бииргэ төрөөбүтэ эрийэн бааһырбыт уолларын ыйыталаспыттар.  «Биһиги исписэлиистэрбит Оборона министиэристибэтин кытта холбооннор барыта быһаарылынна. Оператор иһитиннэрбитинэн, байыас полевой госпитальга сытара, сотору кэминэн байыаннай госпитальга көһөрө билиннэ. Дьоно кинини, сахалыы аата сыыһа суруллубутунан сибээстээн, кыайан булбакка сылдьыбыттар», - диэтэ Мария Винокурова.

Ити курдук, байыастар кыһалҕаларын быһаарыыга атын министиэристибэлэр уонна биэдэмистибэлэр эмиэ кыттыһаллар. Холобур, Доруобуйа харыстабылын министиэристибэтин көмөтүнэн, медицинскэй докумуоннарын сүтэрэн кыайан эмтэммэккэ сылдьыбыт байыас, докумуоннарын сөргүтэн, Дьокуускай балыыһатыгар эмтэнэ киирэр буолбут. 

Байыастар кыһалҕаларынан чугас дьонноро Дьокуускайга  122 кнопка 1, оттон атын сиртэн  8(4112)510-122 нүөмэринэн эрийиэхтэрин сөп.