Моҥкуруукка барбыт киһи туох кутталлааҕый

Моҥкуруукка барбыт киһи урут-хойут атыылаабыт атыы-эргиэн дуогабара суутунан көтүрүллүөн сөп. Атыы-эргиэн, кэргэннии буолуу уонна бэлэхтээһин дуогабардара суут нөҥүө көтүрүллэр кыахтаахтар. Холобур, сокуоҥҥа олоҕуран, моҥкуруукка барбыт киһи, бэйэтин моҥкуруутунан биллэриэн 3 сыл иннинэ атыылаабыт үбэ тута баайын куоттаран атыылаабытыгар уорбаланар уонна суукка бэриллэр.

Олох көрдөрөрүнэн, бэл 3 сылтан тахса сыллааҕыта оҥоһуллубут сделкалары көтүрүөххэ сөп буолла. Суут моҥкуруукка барбыт киһи ол саҕана номнуо иэһин-күүһүн төлөһөр кыаҕа суох эбитин быһаардаҕына, бу атыы-эргиэн дуогабардара дьиҥэ суоҕунан ааҕыллаллар. Онон көннөрү атыылаһааччыга куттал үөскүүр.

 Дьиэ дуу, массыына дуу атыыласпыт киһигит моҥкуруут буолбут аатырдаҕына, үпкүтүн былдьаан ылыахтарын сөп. Оннукка түбэспэт туһугар тугу билиэхтээхпитий?

Бастатан туран, хамсаабат баай-дуол докумуонун барытын сыныйан үөрэтэбит.

Иккиһинэн, бу баайынан-дуолунан атыылыыр киһи хайдах баһылаабытын билиэхтээхпит. Атыыласпыт дуу, бэлэхтэппит дуу о.д.а.

Үсүһүнэн, бас билии эбийиэгин (кыбартыыра, массыына о.д.а.) дьиҥнээх сыанатын билэн таһаарыахтаахпыт.

Төрдүһүнэн, бу хамсаабыт баайы-дуолу бас билиигэ мөккүөрдэр баалларын-суохтарын үөрэтэбит.

Ол аата массыынаны эбэтэр кыбартыыраны атыылаһарбытыгар хайаан да юридическэй өттүнэн ыраас буоларын бэрэбиэркэлиэхтээхпит:

— Суут бириистэптэрин федеральнай сулууспатын официальнай сайтыгар атыыһыт туһунан информацияны булгуччу көрдөөҥ;

— Арбитражнай дьыалалар картотекаларыгар көрдөөҥ;

— Массыынаны атыылаһаргытыгар ПТС көрөн, хас хаһаайыннаммытын быһаарыҥ, киһи сэрэхэдийэр өрүттээх эргиниилэр манна тахсан кэлиэхтэрин сөп;

— Хамсаабат баайы-дуолу (недвижимость) атыылаһаргытыгар бу баайга-дуолга бас билии быраабын туһунан кэпсиир выписканы ирдэһиҥ, хас хаһаайын, хас сделка барбытын көрүҥ.

Тугу эмэ саарбахтыы санаатыгыт да, дуогабары түһэрсимиэххитин эбэтэр “титульнай страховкалааһын” диэнинэн туһаныаххытын сөп. Титульнай страховкалааһын – эбийиэги бас билии туһунан мөккүөрдэртэн харыстаныы страховката.

Дьиҥэ, моҥкуруукка барбыт киһи урут-хойут оҥорсубут сделката барыта сотуллан хаалан, көтүрүллэр диэн буолбатах. Холобур, массыынаны атыылаһыаххыт иннинэ Суут бириистэптэрин сайтын бэрэбиэркэлээбит буоллаххытына, атыыһыт ол саҕана онно суох, кэнники иэскэ-күүскэ киирбит буоллаҕына, суут атыыласпыт киһи диэки буоларын юридическай быраактыка көрдөрөр.