МИН КУОРАТЫМ

 Иллээх ыаллаһыы сылынан хаһыаппыт “Мин куоратым” бырайыагын салҕыыр

Сайсары – киин куорат биир киэн туттар, элбэх нэһилиэнньэлээх уокуруга. Норуот номоҕор үгүстүк ахтыллар Тыгын бу күөл кытылыгар олорбута диэн билэбит. Манна быһа холоон 40 тыһ. киһи олорор. 595 дьиэ баарыттан, 468-һа – мас дьиэ. Уокурук хаарбах туруктаах дьиэлэрин өрөмүөннээһин, кыстыкка киллэрии, уокурук тупсаҕай көстүүтүн ситиһии, бөҕү тиэйтэрии, ыраастааһын – бу барыта баһылык Леонид БЯСТИНОВ салалтатынан быһаарыллар боппуруостар. Бүгүн баһылык сөбүлээн ааҕар хаһыатыгар киин куоратын бэлиэ миэстэлэрин сэһэргиир.

ЧОЧУР МЫРААН

Саха киһитэ айылҕалыын алтыһан, бултаан-алтаан тыыннаах буолан кэлбитэ. Куораппыт биир ытык сиринэн мин Чочур Мырааны ааҕабын. Манна сайыннары-кыһыннары сөбүлээн сынньанабын, күүс-уох ылабын. Саас халлаан сылыйдаҕына уокурук олохтоохторо кыттыылаах улахан субуотунньук тэрийэбит.

26 №-дээх ОСКУОЛА

Бу оскуолаҕа мин бастакы кылаастан сэттискэ диэри үөрэммитим. Син-биир хас биирдии киһи оскуолатын сылаастык саныыр, ахтар, туох сонуннааҕын билсэ-көрсө сылдьар. Куорат биир бастыҥ оскуолатыгар үөрэммиппинэн киэн туттабын.

УСТУДЬУОН КУОРАТА

Сэргэлээх. Куорат уола буолан, Сэргэлээх уопсайыгар олорботоҕум эрээри, бу сири олус күндүтүк саныыбын. Урут бу диэки олорбутум. Бастакы идэм – история учуутала.

УЙБААН ШАМАЕВ ОСКУОЛАТА

Өрөспүүбүлүкэтээҕи лицей-интэринээт. Мин манна 10-11 кылаастарга үөрэммитим. Лицей мин киһи буолан тахсарбар, улаатарбар, олоҕум суолун буларбар төһүү күүс буолбута. Уйбаан Шамаев оскуолата билиҥҥэ диэри биир бастыҥ үөрэх кыһатын аатын тута сылдьар. Манна сыллата өрөспүүбүлүкэ араас муннугуттан дьоҕурдаах оҕолор кэлэн үөрэх-билии  ылаллар.

ИЙЭ БОЛУОССАТА

Бу паамытынньыкАҕа дойду Улуу сэриитигэр ийэ оруолун үйэтитэр сыаллаах. Ийэ уобараһа хайа баҕарар норуокка, киһиэхэ хаһан даҕаны сүппэт ураты куттаах бэлиэ. Ийэ болуоссата былыргы сахалар түөлбэлээн олохсуйбут сирдэригэр турара, мин санаабар, саамай сөп. Куорат олохтоохторо бары сөбүлээн сылдьар, сынньанар, айылҕалыын алтыһар сирдэрэ.