«Мин дьиэ кэргэним — мин өрөспүүбүлүкэм» күрэххэ кыттарга тиэтэйиҥ!

Өрөспүүбүлүкэ күнэ – Сахабыт сирин дьонун-сэргэтин сомоҕолуур, түмэр ураты бырааһынньык. Дьокуускай куорат Ыччакка уонна дьиэ кэргэн политикатыгар управлениета муус устар 13-27 күннэригэр Instagram ситимҥэ элбэх оҕолоох ыалларга аналлаах күрэх биллэрэр. 
Усулуобуйата сүрдээх судургу: дьиэ кэргэн биир уопсай хаартыскатынан кыттар. Инстаграмҥа #МояСемьяМояРеспублика диэн хэштегинэн бэлиэтээн угаҕыт, араспаанньаҕытын суруйаҕыт уонна тута күрэх кыттааччылара буола түһэҕит. Аккауҥҥут  хайаан да аһаҕас буолуохтаах. Кыайыылаахтары муус устар 27 күнүгэр @molodezhka_ykt аккауҥҥа быһаарыахтара. 
Бүгүн Ыччат уонна дьиэ кэргэн политикатын управлениета биллэрбит күрэҕэр киирбит чаҕылхай хаартыскалары “Киин куорат” хаһыакка таһаарабыт.  
Барыгытын кэлэн иһэр Өрөспүүбүлүкэ күнүнэн итиитик-истиҥник эҕэрдэлиибит. Өрүү көхтөөх, түмсүүлээх буолуҥ, дьиэ кэргэҥҥитин харыстааҥ!