Михаил Николаев аатынан проспекка маҥнайгы саҥа дьиэ үлэҕэ киирдэ

Бэҕэһээ, тохсунньу 19 күнүгэр, киин куоракка Бастакы Бэрэсидьиэн Михаил Николаев аатынан проспект ыйынньыктаах бастакы дьиэ олохтоохторо күлүүстэрин туттулар.
Саҥа дьиэ хаһаайыттарынан сүрүннээн Уһук Илин учууталларга уонна медиктэргэ чэпчэтиилээх ипотекатын кыттыылаахтара буолбуттар. Манна даҕатан Ил Дархан Айсен Николаев дойду баһылыга Владимир Путиҥҥа нэһилиэнньэни олорор дьиэнэн хааччыйар судаарыстыбаннай бырагыраамалар үлэлииллэригэр махтанна.
Ол курдук, тутуу миниистирин солбуйааччы Евгений Афанасьев иһитиннэрбитинэн, саҥа дьиэ 123 кыбартыыратыттан 59-һа чэпчэтиилээх бырагырааманан атыылаһыллыбыт, ол иһигэр 50 — Уһук Илин ипотекатынан. Оттон 16 мэндиэмэннээх, 5,9 тыһыынча кв/м уопсай иэннээх элбэх кыбартыыралаах дьиэни тутааччы «Проф-строй» («Сэттэ») тэрилтэ болдьоҕун иннинэ үлэҕэ киллэрдэ. 
Дьокуускай куорат баһылыгын солбуйааччы Антон Алексеенко бүгүн үлэҕэ киирбит саҥа дьиэ дьон-норуот өйүгэр-санаатыгар өрөспүүбүлүкэбит Бастакы Бэрэсидьиэнин аатынан проспект маҥнайгы дьиэтин курдук үйэлэргэ умнуллуо суоҕа диэн туран, Михаил Николаев аатынан проспект диэн уларытыллыбыт урукку Автодорожнай уулусса мантан ыла саҥалыы тыыннанарыгар эрэлин биллэрдэ, диэн СИА иһитиннэрэр, Мария Васильева хаартыската.