Михаил Мишустин Онкологическай киин эбии үбүлээһинин өйөөтө

 РФ бырабыыталыстыбатын бэрэссэдээтэлэ Михаил Мишустин Саха сиригэр Онкология киинин тутуутугар эбии үбүлээһин туһунан этиини өйөөтө.

«Биллэн турар, ситэри тутуохха наада. Ирдэнэр докумуоннары бэлэмнээҥ, сыл бүтүөр диэри экспертиза бигэргэтиитэ түмүктэниэҕэ. Көмөлөһүөхпүт», – диэтэ премьер-миниистир өрөспүүбүлүкэ Ил Дархана  Айсен Николаевтыын көрсүһүүтүгэр.

Айсен Николаев дьүүллэһии кэмигэр тутууну бүтэрэргэ эбии 2,8 миллиард солкуобай ирдэнэрин бэлиэтээтэ, итинтэн 2 миллиардтан тахса солкуобай — тэрили атыылаһарга.

«Кэнники сылларга дойду бырабыыталыстыбатын өйөбүлүнэн өрөспүүбүлүкэҕэ доруобуйа харыстабылын элбэх саҥа эбийиэгэ баар буолла, холобур, кардиология киинэ, бу билигин онкология киинэ тутуллар. Матырыйаал уонна тэрил сыаната үрдээбитинэн сибээстээн тутууну ситэрэргэ эбии үбүлээһининэн өйөбүлү көрдөһөбүт. Билиҥҥи туругунан тутуу бэлэмэ 77%», – диэтэ Ил Дархан.

Эбийиэк уопсайа түөрт блоктаах буолуохтаах: поликлиникалар, эпэрээссийэлиир блок уонна стационар. Стационар  180 куойкалаах уонна хаһаайыстыбаннай блоктаах, манна биир сменаҕа 210 киһини көрөрү былаанныыллар.