«МЭР-2022» дьыалабыай оонньуу IV-с түһүмэҕэ түмүктэннэ

Муус устар 16 күнүгэр, Арассыыйа норуоттарын култуурунай нэһилиэстибэтин сылыгар анаммыт, квест – оонньуу быһыытынан ыытыллыбыт «МЭР-2022» дьыалабыай оонньуу IV-с түһүмэҕэ түмүктэннэ.  Бу туһунан Олохтоох дьаһалта пресс-сулууспата иһитиннэрдэ.
Бу түһүмэх тэрийээччитинэн Олохтоох дьаһалта каадырга уонна муниципальнай сулууспаҕа управлениета буолла.
Оонньуу 10:10 чааска саҕаланна, хамаандалар биэстии сорудаҕы ылан баран маршруттарын оҥорон, куорат хонтуруолунай туочукаларыгар тиийэн кодовай информацияны хомуйдулар.
Квест-оонньууну бастакынан сорудаҕын 1 чаас 2 мүнүүтэнэн толорон «Тупсаран оҥоруу» хамаандата түмүктээтэ. Иккис миэстэҕэ сорудаҕы 1 чаас 7 мүнүүтэнэн оҥорон «Куораты тутуу уонна архитектура» хамаандата таҕыста. Үһүс миэстэҕэ – 1 чаас 19 мүнүүтэлээх «Социальнай блок», төрдүскэ – 1 чаас 21 мүнүүтэлээх «Муниципальнай салайыы систиэмэтин трансформациялааһын», бэһискэ – 1 чаас 25 мүнүүтэлээх «Экономика», алтыска –  1 чаас 32 мүнүүтэлээх «Тырааныспар инфраструктурата, предпринимательство уонна тыа хаһаайыстыбата» хамаандалар таҕыстылар. 
Билигин хамаандалар тиһэх V-с түһүмэххэ бэлэмнэнэллэр. Онно кинилэр бырайыактары оҥорон көмүскүөхтээхтэр. Ити түһүмэх 2022 сыл муус устар 20 күнүгэр Олохтоох дьаһалта Улахан саалатыгар ыытыллар.