Мэдиссиинэ эйгэтин үтүө сонуна
Билиҥҥи кэмҥэ коронавирус дьаҥын пандемиятынан сибээстээн үөскээбит уустук быһыыга-майгыга мэдиссиинэ кислорода тыын суолталааҕынан буолла. Бу күннэргэ мэдиссиинэ эйгэтин үтүө сонуна кэллэ – "Кислород Якутии" хампаанньа Саха сирин балыыһаларыгар мэдиссиинэ кислородун оҥорооһуну саҕалаата. Бу туһунан СӨ Доруобуйа харыстабылын пресс-сулууспата иһитиннэрдэ.
Ааспыт нэдиэлэҕэ Нерюнгри куоракка баар "Кислород Якутии" ХЭТ бастакы 8 туонна кислородун Дьокуускайга аҕалбыттара. Итини сэргэ өссө биир тэрилтэ – "Сахаагроплем" кислород оҥоророору сайаапкатын РФ Минпромторгугар ыытан сөбүлэҥ ыларга үлэлэһэ сылдьар. Инники региоҥҥа кислороду Хабаровскай кыраайтан тиэйэллэр этэ. Коронавирус дьаҥын мунньаҕар Айсен Николаев миэстэтигэр кислороду оҥорорго хааччыйалларыгар сорудахтаабыта. Итини сэргэ, кини сорудаҕынан өрөспүүбүлүкэ балыыһаларыгар мэдиссиинэ кислороднай станцияларын атыылаһыахтара.
Дьокуускайга диэри убаҕас кислород тиэйиитин тырааныспар уонна суол хаһаайыстыбатын Министиэристибэтэ оройуон дьаһалталарын кытта кыттыһан тырааныспарынан арыаллыыр.
Кислороду ыларга от ыйыгар өрөспүүбүлүкэ резервнэй пуондатыттан үбүлээһин көрүллүбүт.
Сонуннар
Ордук ааҕаллар
