Медиктэргэ эбии төлөбүр болдьоҕо уһуур

СӨ Ил Дархана Айсен Николаев коронавирус дьаҥынан ыалдьыбыт киһи ахсаана элбээбитинэн сибээстээн, Саха сирин быраабыталыстыбата “кыһыл зонаҕа” үлэлиир медиктэргэ эбии региональнай төлөбүр болдьоҕун уһатар туһунан быһаарыыны бэлэмниирин эттэ. 

“Ковиды кытта охсуһа сылдьар медиктэр региональнай төлөбүрү булгуччу ылыахтара. Биллэн турар, өрөспүүбүлүкэ бүддьүөтүгэр ити эбии ороскуот. Ол эрэн дьон доруобуйатын туһугар мин кэмчилиири көҥүллээбэппин”, – диир Айсен Николаев.
Өрөспүүбүлүкэтээҕи суһал штаб салайааччыта Ольга Балабкина бүгүҥҥү брифиҥҥэ эппитинэн, ааспыт сууккаҕа коронавируһунан ыалдьыы 111 түбэлтэтэ бэлиэтэммит. Дьокуускай куоракка ордук элбэх киһи ыалдьыбыт – сууккаҕа 61 киһи. Суукка иһигэр лабораторияларга 3 245 чинчийии оҥоһулунна.