Майк Тайсон уонна Рой Джонс киирсиилэрин дьон сэҥээрдэ

Ааспыт нэдиэлэҕэ профессиональнай бокска аан дойду икки ыарахан ыйааһыннаах аан дойду чөмпүйүөннэрэ Рой Джонс уонна Майк Тайсон шоу-киирсиилэрэ болҕомто киинигэр турда. Гонорардара да ботуччу буолла: Майк Тайсон 10 мөл. доллары, Рой Джонс 3 мөл.доллары ылыахтаахтар.

Аан дойду абсолютнай чөмпүйүөнэ Тайсон рингэҕэ тахсыбатаҕа 15 сыл буолбут, онтон, атын-атын ыйааһыннарга аан дойду хас да төгүллээх чөмпүйүөнэ Рой Джонс икки эрэ сыллааҕыта күрэхтэһэн бүппүт. Сибиэһэй соҕус. Сааһырбыт боксердар тутта-хапта сылдьалларытттан сылыктаатахха, иккиэн да кичэллээхтик эрчиллибиттэрэ көстөр. Рой Джонс бу икки-үс сыллааҕыта Дьокуускайга кэлэ сылдьан маастар-кылаас көрдөрбүтэ. Онон, Саха сирин спорка сүгүрүйээччилэрэ бэйэ киһитин курдук ылыннылар. Ол да буоллар, профессиональнай бокс ыалдьааччыларын санаалара икки аҥы хайдыста: сорохтор арыый эдэр, 51 саастаах, түргэн тарҕан Рой Джонс кыайарыгар саарбахтаабаттарын биллэрдилэр, атыттар кырыктаахтык охсуһар, кими да харыстаабакка сынньыталыыр, 54 саастаах Майк Тайсон хоторугар эрэннилэр.

Аатырбыт-сураҕырбыт боксердар иккилии мүнүүтэлээх аҕыс раунд устата толору охсустулар. Икки сааһырбыт боксердар сытыы, күүстээх охсуулардаах бэрт сэргэх киирсиини көрдөрдүлэр. Көрсүһүү тэҥнэһиинэн түмүктэннэ.

Баһылай Посельскай