Матрена Ноговицына – сүүс харахтаах дуобат чемпионката

Аан дойдутааҕы гроссмейстер, Чурапчы улууһуттан төрүттээх Матрена Ноговицына Саха сирин устуоруйатыгар классическай бырагыраамаҕа сүүс харахтаах дуобакка бастакы чемпионканан буолла. 
Күрэхтэһии Эстонияҕа Таллинн куоракка ыытыллыбыт. Матрена болдьоҕун иннинэ, биир тууру оонньоот, чемпионка үрдүк аатын ылбыт. 
«Спортсменкабытын, тренердэрин, өрөспүүбүлүкэ дуобакка Федерациятын эҕэрдэлиибит. Биһиги спортсменнарбыт өссө төгүл улуустарын аатыртылар. Матрена Саха сирин устуоруйатыгар классическай бырагыраамаҕа бастакы, Арассыыйаҕа иккис чемпионканан буолла. Оройуоммутугар физическэй култуураҕа уонна маассабай спортка улахан болҕомто ууруллар», - диир Чурапчы улууһун баһылыга Андрей Ноговицын.
Чемпионка ийэтэ – Мария Николаевна кэпсээбитинэн, Матрена «технаардар» уонна дуобатчыттар дьиэ кэргэннэригэр улааппыт. Кини аҕата – Степан Тимофеевич – дуобакка маастарга хандьыдаат. Ыал аҕата уонна уолаттара бары дуобаттыыллар, оттон ийэтин өттүнэн аймахтара бары техническэй хайысхалаах идэлээхтэр эбит. 
Матрена биэс сааһыттан дуобаттаан саҕалаан, салгыы уһуйааҥҥа, оскуолаҕа оонньообут. 
«Атын дьарыктааҕын сатаан ойуулаан көрбөппүн. Иллэҥ кэмэ да суох. Биирдэ эбит айылҕаҕа сынньанарбытын сөбүлүүбүт. Иллэҥсийдэҕинэ кыыһым ааҕар, доҕотторун кытта көрсөр, ас астыырын сөбүлүүр. Ийэ киһи быһыытынан спортивнай ситиһиилэри сэргэ оҕом дьахтар уонна ийэ быһыытынан дьоллоох буолуоҕун баҕарабын. Матрена классическай дуобакка Аан дойду чемпионката буоллахпына биирдэ ыал буолар туһунан толкуйдуоҕум диэн күлбүтэ», - диир ийэтэ Мария Николаевна.