Массыына атыылаһыаххыт иннинэ бэрэбиэркэлээҥ

Билигин моҥкуруукка барыы киэҥник тарҕанна эбэтэр түөрт көлүөһэлэээх тырааныспары кирэдьииккэ киирэн ылыы олус элбээтэ. Бааҥҥа солуок угуллубут массыынаны атыыга таһаараллара кистэл буолбатах. Маныаха атыылаһааччы тугу да билимиэн сөп.

Массыына атыыласпыккыт кэннэ былдьаан ылыахтарын сөп. Манныкка түбэспэт туһугар массыынаны атыылаһыаххыт иннинэ бэрэбиэркэлиэхтээххит:

1. www.reestr-zalogov.ru сайтка бэрэбиэркэлээҥ. Онтон нотариуска баран массыына ханна да солуокка турбатын билиҥ, хайаан да солуок реестригэр бу массыына суоҕун туһунан выписката ылыҥ. 

Кэлин бу массыына солуокка турара биллэн хааллаҕына даҕаны, атыылаһар күҥҥүтүгэр ылбыт выпискаҕытын суукка көрдөрөн, массыынаҕытын былдьыылларыттан быыһаныаххыт.

2. Атыылааччы иэстэрин fssprus.ru сайтка бэрэбиэркэлээҥ. Атыылааччы аатыгар исполнительнай производство суох буолуохтаах.

Бастатан туран, иэстээх киһи моҥкуруукка барарга быһаарыныан сөп, оччоҕо атыы-эргиэн дуогабара көтүрүллэр кутталланар.

Иккиһинэн, исполнительнай производство саҕаланнаҕына, бириистэп массыынаҕа арест ууруон эбэтэр массыына эрдэ хааччахтаммыт буолуон сөп.

3. Массыынаны гибдд.рф сайтка бэрэбиэркэлээҥ:

- регистрация историятын;

- саахалларга түбэһиитин;

- ирдэбилгэ сылдьыытын;

- хааччахтары.

ГИБДД сайта сүүс бырыһыан юридическэй ыраас буолууну мэктиэлээбэт, көннөрү информативнай эрэ сыаллаах толоруллар эрээри, таҥара сэрэҕи таптыыр.

4. Атыылааччы дуокумуоннарын бэрэбиэркэлээҥ.

- ПТС;

- регистрация сибидиэтэлистибэтин;

- массыына атыытыгар кэргэнин нотариуһунан бигэргэммит сөбүлэҥин;

- дэбиэринэһинэн атыылыыр киһи буоллаҕына, дэбиэринэс оригиналын reestr-dover.ru киирэн көрүҥ.

Массыына атыылаһаргытыгар дуогабарга сыанаҕытын кыччаппакка суруйаргыт ордук.