Марха дьаһалтата тугу үлэлиирий?

Мархаттан куоракка киирэр төлөбүрбүт куоратынан сыаналанар. Ол эрэн, олорор балаһыанньабыт ырааҕынан эппиэттээбэт. Саатар, тохтобулга сырдатар лаампалары тоҕо ыйаабаттарый?

Оҕолорбутун, сиэннэрбитин оскуолаттан, оҕо саадыттан аҕаларга им-балай хараҥаҕа харбыалаһыы буолабыт. Приходько диэн хотун уурайан баран, эмиэ төттөрү кэлбит, атын үлэлиир киһи көстүбэтэх буоллаҕа дуу? Тылынан тугу барытын үмүрү тутуохча курдук  төлөпүөн үөһэ олорор да, туга да сатаммат курдук. Марха олохтоохторо кыһалҕаттан харчы бырахсан, уулуссаларбытыгар буор куттарабыт. Суолларга буор куттахха уу суурайан кэбиһэр, бадараан буолар, улахан массыыналар хаһан кэбиһэллэр. Ыттар, кэтэх аттар элбэхтэрин этэ да барыллыбат. Быйыл өссө элбээтилэр. Урут аҕыйах кэмҥэ сүтэ сылдьыбыттара. “Мархинскай” оптуобус тохтобулугар толорулар, бөҕү суолу биир гына ыһаллар. Аттар, ыттар хаһаайыттарын ыстарааптаан иһиэххэ наада. Хаһаайыттара суохтар дуу диэх айылаах. Бөх баахтарын суолтан арыый тэйиччи соҕус туруоруохха. Манна дьаһалта үлэтэ көстүбэт курдук. Мархаҕа мас олордуутун, көҕөрдүү үлэтин дьаһалта ыытара буоллар. Ол чааһыгар үлэ ыытыллыбатын кэриэтэ. Оптуобустары барыларын кондуктордыыр ирдэбил туруохтаах. Сайынын итиигэ түннүктэрин сабыылыахха, кыһын түннүктэрэ кырыа, оптуобус тохтобулун биллэрбэттэр. Кыра, кыаллар боппуруостар тоҕо быһаарыллыбаттарый? Марха дьаһалтата тугу үлэлиирий? Күөлү уоллараары оботторбут диэн, ууну төттөрү-таары хачайдыыллар. Мин санаабар, ол харчытынан суоллары үрдэтиэххэ, оҥотторуохха баара.

                                             Мария Семенова, Дьокуускай куорат