Мархаҕа ыраастааһын үлэтэ күүһүрэр

Марха микрооройуонугар толору хааччыллыыта суох олорор дьиэлэр тастарыгар субуотунньук буолан ааста. Коммунальщиктар тоҥон турар бөх кутуллар дьаамаларын уулларан ыраастаатылар.

Марха администрацията иһитиннэрбитинэн, “Жилкомсервис” уонна “Теплоэнергия” 2 паардыыр массыыналара үлэлээтилэр. Үлэ бастакы түһүмэҕин “Теплоэнергия” тиэхиньикэтэ Комаров уул., 4, 8, 12, Заводской уул., 3, ул. Экспериментальнай уул., 8, «Лидер плюс» Салайар хампаанньа үлэһиттэрэ толордулар. Иккис түһүмэххэ “Жилкомсервис” МУТ  Интернациональнай уул., 7, Олег Кошевой уул., 63-65, Дзержинскэй уул., 9-10 бөх дьаамаларын ыраастаатылар.

Бэлиэтээн эттэххэ, Дьокуускайга уонна куорат кытыы нэһилиэктэригэр олунньу 8 күнүттэн ыраастаныы үс ыйа биллэриллибитэ.