Мархаҕа бассейннаах спорткомплекс аһыллыаҕа

Физкультурнай-чэбдигирдэр комплекс бассейннаах уонна катоктаах буолар.

«Улахан спортивнай комплекс буолуохтаах, манна билигин тренердэртэн саҕалаан араас исписэлиистэргэ тиийэ үлэһиттэр наадалар, холобур, катогунан дьарыктанааччылар. Дьокуускайга муус дыбарыаһыгар итинник үлэһиттэр бааллар, ол эрэн саҥа комплекска туспа үлэһиттэр наадалар. Ити боппуруоһу Спорт министиэристибэтин уонна куорат салалтатын кытта быһаарыахпыт», – диэтэ Андрей Тарасенко.

Тутуу үлэтэ график быһыытынан баран иһэр, сотору кэминэн катогу тымныынан хааччыйар тэрил туруоруллуохтаах.  Катогу сэргэ икки бассейн, эрчиллэр саалалар баар буолуохтара.

«Ый иһигэр бэдэрээтчиктэр тутар-таҥар үлэни бүтэриэхтээхтэр, онтон эбийиэги докумуоннааһын ыытыллыаҕа.  Комплекс күһүн аанын тэлэччи аһыаҕа диэн эрэнэбит. Андрей Владимировичтыын Физкультурнай-чэбдигирдэр комплекс хааччыйааһынын уонна төһө үлэһиттээх буолуохтааҕын дьүүллэстибит», – диэн телеграм-ханаалга куорат баһылыга Евгений Григорьев иһитиннэрдэ.