Мархаҕа 90-тан тахса дьиэ гаас ситимигэр холбонно

Марха дьоҕус оройуонун дьаһалтатын баһылыга Николай Ксенофонтов информациятынан, гаас ситимигэр 91 дьиэ холбонно.

«Билиҥҥи туругунан, Мархаҕа 69 дьиэ гааһы ыыталларын күүтэр. 52 дьиэҕэ тутар-таҥар үлэ бара турар», - диэтэ Николай Ксенофонтов.

Бу иннинэ Московскай уулусса дьиэлэригэр техническэй биричиинэнэн гааһы холбууртан аккаастаммыттар. Былырыын олохтоохтор кыһалҕаларын «Биир Ньыгыл Арассыыйа» баартыйаҕа, Судаарыстыбаннай Дуума дьокутаата Галина Данчиковаҕа эппиттэр. Ити кэнниттэн хамсааһын тахсан, регионнааҕы бырагыраамаҕа уларытыылар киирбиттэр.

Быйыл Московскай уулуссаҕа 4,5 км кэриҥэ гаас ситимин тутан дьиэлэри холбуу сылдьаллар.

«Сахатранснефтегаз» АУо старшай маастара Иннокентий Гуляев эппитинэн, 2022 сылга Дьокуускайга 768, эрдэ түһэрсиллибит дуогабардарынан 1154 дьиэ гаас ситимигэр холбоноро былааннаммыт.

«Бүгүҥҥү күҥҥэ социальнай гаастааһын бырагырааматынан 335 дьиэни холбоотубут. Күн аайы 10-15 дьиэҕэ гааһы холбуур соругу туруорабыт. Олохтоохтору кытта үлэ көхтөөхтүк барар, этиллибит болдьоҕор холбуубут. Ахсынньы ыйга диэри былааны аһара толорорбут буолуо дии саныыбын», - диэтэ Иннокентий Гуляев.