Манчаары Оонньууларын аһыллыытын сценарийа норуот суруйааччыларын айымньыларыгар олоҕурбут

Манчаары Оонньууларын үөрүүлээх аһыллыытын сценарийа Горнай улууһуттан төрүттээх норуот суруйааччылара ини-бии Софрон уонна Семен Даниловтар айымньыларыгар олоҕурбут диэн иһитиннэрэр СӨ физическэй култуураҕа уонна спортка министиэристибэтэ. 
Спартакиада үөрүүлээх аһыллыытыгар П.А. Ойуунускай аатынан Саха академическай театра, С. Зверев аатынан үҥкүү Национальнай театра, Судаарыстыбаннай циркэ, Олоҥхо Театра, Г.М. Кривошапко аатынан Судаарыстыбаннай филармония, ХИФУ айар кэлэктииптэрэ уонна «Кыталык» үҥкүү норуодунай ансамбыла (Мэҥэ-Хаҥалас оройуона) кыттыахтара. Култуурунай бырагыраама кыттыылаахтара бары коронавируһу утары быһыыны ылбыттар. 
Тэрээһин кылаабынай режиссера – Саха академическай театрын режиссера Руслан Тараховскай. Официальнай чаас режиссера ХИФУ «Сэргэлээх уоттара» Култуурунай киинин дириэктэрэ Алексей Константинов. Сценарий Горнай улууһуттан төрүттээх норуот суруйааччылара ини-бии Софрон уонна Семен Даниловтар айымньыларыгар олоҕурбут. Семен Данилов элбэх хоһооно туһаныллыбыт. 
Үөрүүлээх аһыллыы театрализованнай чааһын сүрүн тиэмэтэ – кэлэр кэскил, IT технологиялар, инникигэ хардыы. «Култуура уонна духуобунай сайдыы министиэристибэтин аатыттан улуус бары олохтоохторугар култуурнай бырагыраамаҕа көмөҕүт уонна өйөбүлгүт иһин махтанабын», - диэбит миниистир солбуйааччыта Марина Силина.