Манчаары Оонньуулара хайдах көрүҥүнэн ыытыллара быһаарыллар

Спорт национальнай көрүҥнэригэр XXI Спартакиада от ыйын 6-11 күннэригэр ыытыллара былааннаммыта. Бэс ыйын 28 күнүгэр СӨ баһылыга Айсен Николаев суһал штаб мунньаҕар Манчаары оонньууларын хайдах көрүҥүнэн ыытар туһунан түргэнник быһаарарга сорудах биэрдэ. 
Ити сорудах Горнай улууһугар вакцинация тэтимэ намыһаҕыттан уонна коронавируһунан ыалдьыы түбэлтэтэ элбэҕиттэн сиэттэрэн таҕыста.
Маҥнайгы былаанынан, тэрээһиҥҥэ 7 тыһыынчаттан тахса коронавирус дьаҥын утары быһыыны ылбыт, COVID-19 ыалдьыбат диэн үчүгэй көрдөрүүлээх тестээх киһи кыттыыны ылыахтаах этэ. Ол эрэн коронавируһу кытта сибээстээх быһыыны-майгыны учуоттан, Манчаары Оонньууларын ыытыы көрүҥэ уларыйыах курдук. 
Айсен Николаев бииргэ үлэлиир дьонугар Өлүөхүмэ оройуонугар Олоҥхо ыһыаҕын үрдүк таһымнаахтык ыыппыттарыгар махтанан туран, бу күннэргэ Горнай улууһугар ыытыллыахтаах Манчаары Оонньууларын хайдах көрүҥүнэн ыытар туһунан этиилэрин киллэрэллэригэр сорудахтаата. Кини Горнай улууһугар эпидемиологическэй туругу уустугунан ааттаата. 
Икки нэдиэлэтээҕи түмүгүнэн Горнайга коронавирус дьаҥынан ыалдьыы 38 түбэлтэтэ таҕыста. «Суһал штабы бу боппуруоһу быһаарарга боччумнаахтык сыһыаннаһаргытыгар көрдөһөбүн. Өлүөхүмэҕэ Олоҥхо Ыһыаҕа буолуо икки нэдиэлэ иннинэ коронавируһунан ыалдьыы түбэлтэтэ тахсыбатаҕа. Оттон Бэрдьигэстээххэ ааспыт нэдиэлэҕэ ыарахан туруктаах дьон реанимацияҕа киирбит түбэлтэлэрэ баар», - диэтэ Айсен Николаев. 
Өрөспүүбүлүкэ баһылыга Горнай улууһугар былааннаммыт 60%-тан нэһилиэнньэ баара суоҕа 22,8% эрэ вакцинацияламмыт, вакцина 85% туттуллубут. Кылаабынай санитарнай быраас этэринэн, спортсменнэр да ортолоругар вакцинация намыһах эбит. 
«Итинник көрдөрүүлээх олорон, тэрийэр кэмитиэт уонна оройуоннаҕы суһал штаб туһааннаах миэрэлэри ылбат буоллахтарына, күрэхтэһиини хайдах көрүҥүнэн ыытабыт эрэ диэн буолбакка, тэрээһини көһөрөр туһунан эмиэ толкуйдуохха сөп. Быһаарыыны дьон олоҕор уонна доруобуйатыгар куттал суоһаабатын курдук ылыныахха наада», - диэн тоһоҕолоон бэлиэтээтэ Айсен Сергеевич. 
Итини сэргэ баһылык өрөспүүбүлүкэ үрдүнэн вакцинация тэтимэ үрдээбитин туһунан эттэ. Ити хайысханан үчүгэй көрдөрүүлээхтэринэн Анаабыр (91% вакцинацияламмыт), Аллайыаха (87%), Муома (86%), Эбээн-Бытантай (84%), Эдьигээн (82%), Аллараа Халыма (78%) оройуоннарын ааттаталаата. Вакцинацияҕа мөлтөх көрдөрүүлээхтэринэн Нерюнгри (33%), Таатта, Чурапчы, Амма (40%) оройуоннара ааттаннылар.