Магистратураҕа үөрэниэн баҕалаах элбиир

Иһитиннэриигэ этиллэринэн, магистратура бары хайысхаларыгар докумуоннары тутуу от ыйын 30 күнүгэр түмүктэннэ. Киин приемнай хамыыһыйаҕа 2234 сайабылыанньа киирдэ.

Билигин абитуриеннар киирии тургутуктары ааһаллар, атырдьах ыйын 11 күнүгэр киирээччилэр куонкурустаах испииһэктэрэ биллиэхтээх. Атырдьах ыйын 15 күнүгэр целевой үөрэххэ, онтон атырдьах ыйын 19 күнүгэр тургутуу түмүгүнэн сүрүн миэстэлэргэ киирии бирикээһэ тахсыахтаах.  

Абитуриеннар ордук финансовай-экономическэй институт «Судаарыстыбаннай уонна муниципальнай салайыы (Цифровой куорат)» хайысхатын талаллара көһүннэ. Социология уонна персоналы салайыы кафедратын доцена, бырагыраама салайааччыта

Оксана Романова иһитиннэрбитинэн, быйылгы үөрэх дьылыгар устудьуоннары бастакы төгүлүн очнай көрүҥүнэн үөрэтэллэр. Үөрэх бырагыраамата судаарыстыбаннай уонна муниципальнай салайыы менеджердэрин бэлэмнииргэ туһуламмыт.

«Үөрэҕи бүтэрээччилэр куорат дьаһалтатыгар үлэлиэхтэрэ, салайыы технологиятын оҥоруохтара, куорат олоҕун бары эйгэтин цифровой көрүҥҥэ көһөрүөхтэрэ. Итиэннэ атын куораттар дьаһалталарын исписэлиистэрин кэтэхтэн үөрэххэ ылары былаанныыбыт. Бырагыраамабытын Ньурба, Өлүөхүмэ, Үөһээ Дьааҥы уонна Орто Халыма куораттар салайааччылара биһирээтилэр, сөбүлэҥнэрин биллэрдилэр. Кинилэр исписэлиистэрэ биһиэхэ кэлэн үөрэнэн куораттарын сайыннарыахтара диэн эрэнэбит», – диир Оксана Романова.

Куораты стратегиялаахтык салайыы туһунан дьиссипилиинэни куорат баһылыга Евгений Григорьев ааҕара сабаҕаланар.