Маҥнайгы кылаас үөрэнээччилэригэр оскуола каартата бэриллэр
Оскуола каартатын сыаната – 100 солкуобай, итинэн куорат иһигэр уонна кытыытыгар сылдьыахха сөп: Табаҕа, Хатас, Кангалаас, Маҥан, Тулагы, Пригороднай, «Сатал» СОНТ, Марха (Мархатааҕы 1-гы, 2-с уонна 32-с оскуолаларга сыһыарыллыбыт территорияларга).
Каартаны оҥотторор туһунан сайаапканы баан сайтыгар хаалларыахха сөп, каарта 3-5 үлэ күнүнэн бэлэм буолар.
1-4 кылаас үөрэнээччилэрин кытта сэргэ 5-11 кылааска үөрэнэр кыаммат дьиэ кэргэттэр оҕолоро ыйга 96 төгүл босхо айанныыр лимиттээх каартанан туһаныахтарын сөп. Итиэннэ куорат кытыытыгар олорор 5-11 кылаас үөрэнээччилэрэ 60 төгүл босхо айанныыр лимиттээх каартанан туһанар бырааптаахтар.
Оскуола каарталара – оҕо тус аатыгар сылдьар, хаартыскалаах пластиковай каарталар. Бу күннэргэ оҕолору хаартыскаҕа түһэрэн аҕыйах хонугунан каарталары түҥэтиэхтэрэ.
Оҕо каартатын сүтэрбит түбэлтэтигэр «Алмазэргиэнбанк» төгүрүк суукканан үлэлиир киинигэр биллэрэҕит, төлөпүөн нүөмэрэ: 8 800 100-34-22.
Санатар буоллахха, өрөспүүбүлүкэтээҕи «Алмазэргиэнбанк» баан – 2011 сылтан Тырааныспар бырайыагын оператора.
Сонуннар
Ордук ааҕаллар
