Людмила Жиркова уонна «Үктэл» айар түмсүү быыстапката арылынна
Ем. Ярославскай аатынан Саха сирин хотугу норуоттарын култуураларын уонна историяларын түмэлигэр норуот маастара, маастар-педагог, Дьокуускай куоракка “Үктэл” иистэнньэҥнэр айар түмсүүлэрин салайааччыта, СӨ култууратын туйгуна Людмила Жиркова “Национальнай тигии: үгэстэн аныгыга диэри” диэн быыстапката буола турар.
Людмила Жиркова ииһинэн анаан-минээн дьарыктаммыта уонтан тахса сыл буолла. Кини – бары өттүнэн дэгиттэр маастар, үгэс буолбут төрүт иис уонна аныгы тигии ньымаларын дьүөрэлээн, хас биирдии үлэтигэр бэйэтин санаатын уурар, илиитин сылааһын иҥэрэр.
Быыстапкаҕа «Үктэл» устуудьуйа салайааччытын уонна кини уһуйуллааччыларын ураты буочардара көстөр. Людмила Петровна үөрэнээччилэрин кытта араас таһымнаах тэрээһиннэргэ, Бүтүн Арассыыйатааҕы уонна тас дойдулар быыстапкаларыгар, таҥас көрдөрүүлэригэр кыттыбыта.
Маастар биир улахан бырайыагынан быысапканан тигиллибит Саха сирин каартата буолар. Бу каартаны “Үктэл” устуудьуйа 2023 сыллаахха Бүтүн Арассыыйатааҕы “Вышитая карта России” куонкуруска анаан тикпитэ. Ураты уһулуччу айымньыны Людмила Петровна норуот маастардарын Ульяна Миронованы, Ньургуйаана Игнатьеваны уонна СӨ үтүөлээх архитектора Сергей Мироновы кытта алта ый устата айан-тутан таһаарбыттара.
Каарта түөрт өрүтэ иккилии миэтэрэ уһуннаах уонна бу иһигэр 500-чэкэ кэриҥэ араас кыра быысапка ойуулардаах: от-мас, кыыл-сүөл, бырамыысаланнас, олох-дьаһах, айылҕа кэрэ көстүүлэрэ уонна Саха сирин норуоттара – барыта биир айымньыга түмүллэн, хатыламмат үлэҕэ кубулуйбут. Маастардар хас биирдии дэтээлин ымпыгар-чымпыгар тиийэ быысапкалаан таһаарбыт уруһуйдарын өйдөөн-дьүүллээн көрөргө аҕыйах мүнүүтэ тиийбэтэ биллэр.
Маны таһынан араас көстүүлээх саха таҥаһа, уран тигиилээх бууктаах соннор, кыбытык тигиилээх көбүөрдэр, оҕуруо оһуордаах киэргэллэр, сиэдэрэй симэхтээх суумкалар уонна аныгылыы туттар тэриллэр иистэнньэҥнэр хас биирдии үлэлэригэр сүрэхтэрин сылааһын, сатабылларын көрөөччүгэ тиэрдэллэр. Ол да иһин хас биирдии үлэ хатыламмат уратылаах, эриэккэс дьиктилээх. Төрүт үгэс өрө тутуллар, саха ииһэ-ууһа сайдар, утум салҕанар.
Быыстапка балаҕан ыйын 30 күнүгэр диэри үлэлиэҕэ.
Ааптар түһэриилэрэ
Сонуннар
Ордук ааҕаллар
