30.10.2020 | 10:14

Лианаҕа биһиги көмөбүт наада

Лианаҕа биһиги көмөбүт наада
Ааптар: Киин Куорат

Бу ый саҥатыгар эрэдээксийэбитигэр көмө көрдөөн эдэр ийэ кэлэн барбыта. Оҕото эмтэнэригэр кыахтаах, тойон-хотун, бизнесмен дьонтон үп-харчы көрдөһөрүгэр нууччалыы, сахалыы туһаайыы сурук суруйарыгар көмөлөспүппүт. Ол саҕана наадалаах 15 мөлүйүөнтэн иккитэ эрэ хомуллубут этэ...

Билигин кырачаан Лиана Салиева куһаҕан ыарыыны утары охсуһарын өрөспүүбүлүкэ барыта иһиттэ. Норуот көмөтүнэн наадалаах суума аҥаара хомулунна – 8 флакон эмэ атыылаһылынна. Бастаан 15 мөлүйүөн наада эбит буоллаҕына, билигин евро курса уларыйан, 16 300 000 солк ирдэнэр буолла.

Оҕо олоҕо салҕанарыгар, саха биир ыала дьоллоох буоларыгар хас биирдиибит кыттыһыан, кылаатын киллэриэн сөп.

– Мин Светлана Александровна Львова диэммин, Сунтаар улууһун Күндэйэтиттэн төрүттээхпин. Кырачаан кыыһым Лиана Салиева 2016 сыллаахха атырдьах ыйын 2 күнүгэр күн сирин көрбүтэ. Оҕом ыалдьыан иннинэ биһиги Сунтаарга олорбуппут, онтон кэнники Дьокуускайга көһөн кэлэргэ күһэллибиппит.

Оҕом бастаан 2019 сыл кулун тутарыгар ыалдьыбыта. Муннун хаана кэлэр буолбута, дэлби тиритэр этэ, сөп буола-буола температурата тахсара. Улуус стационарыгар киирэн рентген түспүппүтүгэр сэбиргэхтэппит (пневмония) диэн буолбута. Антибиотигынан эмтэммиппит, туруга улам мөлтөөн барбыта. Оҕом дьүдэйэн, ыран испитэ.

Муус устар ортотугар Медицинэ киинигэр кэлэн киирбиппит. Уһун чинчийии, анаалыс түмүгүн кэтэһии кэнниттэн “Нейробластома правого надпочечника с метастазами в лимфоузлы, костный мозг, в кожу, в кости скелета, 4 стадия, группа высокого риска” диэн ынырык диагноһы истибиппит. Онтон ыла мин олоҕум тосту уларыйбыта.

Норуот күүһэ – көмүөл күүһэ!

Ийэҕэ саамай улахан дьоло – төрөппүт оҕото этэҥҥэ улаатара. Оттон Светлана оҕото  кып-кыра сааһыттан куһаҕан ыарыыны утары охсуһар. Ийэ @salievaliana инстаграм страницаҕа эмтэниилэрин, оҕотун туһунан аһаҕастык суруйар. Киирбит харчыны отчуоттаан иһэр, көмөлөспүт дьоҥҥо махталын тиэрдэр:

Кыракый кыысчааным сылтан ордук ынырык ыарыыны утары хорсуннук кииристэ:

— биопсия ылыытын эпэрээссийэтин этэҥҥэ ааста;

— 6 блок күүстээх, немецкэй протоколунанан бэриллэр, химимотерапияны ааста;

— искэнин ылан бырахтылар;

— үрдүк дозалаах химиотерапияны ылла;

— сэлии трансплантациятын ааста (пересадка костного мозга).

Маны барытын Москва куоракка Д.Рогачев аатынан Оҕо гематологиятын, онкологиятын, иммунологиятын чинчийэр медицинэ киинигэр босхо, Доруобуйа харыстабылын министиэристибэтин квотатынан аастыбыт. Оҕобутун быыһыыр туһугар туохпутун барытын ууран биэрэргэ бэлэммит. Эпэрээссийэбит этэҥҥэ ааспыта. Аны бөҕөргөтүөхпүтүн наада.

Билигин мин оҕом доруобай буоларыгар суһаллык “Иммунотерапия GD2 антителами” (динутуксимаб бета) диэни ааһыан наада. Бу терапияҕа киирэр олус ыарахан сыаналаах эмтэр Арассыыйаҕа регистрацията суохтар, ол эрэн Европаҕа уонна Америкаҕа искэн ыарыылаахтары эмтээһиҥҥэ киэҥник туттуллаллар. Урут маннык эмтэниини омук сиригэр эрэ ааһыахха сөбө, быйылгыттан Д.Рогачев аатынан кииҥҥэ, эми бэйэбит атыыластахпытына, эмтэнэр кыахтанныбыт.

Мин оҕом олоҕун салҕыыр эмп 15 000 000 (уон биэс мөлүйүөн) солкуобай сыаналаах.

Биһиэхэ хас биирдии салгынынан тыынар сөкүүндэбит күндү буолла. Ыарыыта салгыы хайдах буолуо биллибэт, хаһан баҕарар уһуктан кэлиэн сөп.

Айыы киһитэ аһыныгас, күн киһитэ көмүскэс! Ким төһө кыахтааҕынан көмөлөһөргүтүгэр көрдөһөбүн.

Мин оҕом үҥкүүлүүрүн таптыыр, оҕо-оҕо курдук оонньуон-көрүлүөн баҕарар, оҕо саадыгар талаһар, оскуолаҕа үөрэниэн баҕарар.

Хоолдьуктаах бэйэм хоҥкуйан туран, сүһүөхтээх бэйэм сүгүрүйэн туран, бар дьоммуттан, хас биирдиигититтэн, көмө харчы көрдөһөбүн.

Биһиги тугу кыайбатахпытый?!

Хомойуох иһин, судаарыстыба уйунар-уйуммат, үбүлүүр-үбүлээбэт эмтээх. Ыалдьыбыт дьон тыыннаах хаалар туһугар туохтарын барытын атыылаан, сүүстэрин тэбэнэн, кирэдьиит киирэн туран эмкэ бараллар. Кыайбатахтарына эрэ дьонтон көмө көрдүүллэр.

Маннык түгэннэргэ норуот тугу кыайбатаҕай? Өйдүүгүөт, кыракый Айтал Кашкин араак ыарыыттан эмтэнэригэр саха дьоно оччолорго хайдахтаах курдук үтүмэн үбү аҕыйах хонук иһигэр хомууйбуттарай! Хомойуох иһин, Айталы ыарыы ытарчалыы ылан баран ыыппатаҕа. Ол эрэн кини кып-кылгас уонна сырдык олоҕо саха дьонун олус күүскэ түмпүтэ. Онтон ыла аһымал аахсыйалар киэҥ хабааннаахтык ыытыллар буолан барбыттара.

Былырыын эдэр ийэ Альбина Дуткина араактан эмтэнэригэр Саха сирин олохтоохторо улахан көмө буолбуттара. Соҕуруу Кореяҕа баран эпэрээссийэлэнэн этэҥҥэ буолла. Билигин киниэхэ көмө хомуйарга арыллыбыт инстаграм страница аһымал хамсааһыҥҥа кыттыһан @pomogi_ykt страница буолан, көмө көрдүүр дьону таһаарар улахан балаһаакка буолла.

Сунтаардар кыыстарыгар Лианаҕа көмөлөһөн таһаарбыт хамсааһыннарыгар өрөспүүбүлүкэ барыта кыттыһан эрэр. Пандемиянан хааччахтар турбатахтара эбитэ буоллар үп-харчы хомуллара чахчы түргэтээбит буолуо этэ.

Социальнай ситимнэргэ кэлиҥҥи кэмҥэ бу ынырык ыарыыны  утары охсуһар дьон көмө харчы көрдөһөллөрө наһаа элбээбитин бэлиэтии көрөр буолуохтааххыт. Бу дьоҥҥо, эн уонна мин эрэ көмөлөһөр кыахтаахпыт. Кинилэр судаарыстыбаттан көмө эрэйэр кыахтара суох, бэйэлэрин кыахтара барыта баранар, ол иһин дууһаларын кыланыытын киэҥ эйгэҕэ таһаарарга тиийэллэр.

***

Кырачаан Лиана Салиева бэйэтэ эмтэнии сүрүн түһүмэхтэрин ааста. Аны киниэхэ биһиги өйөбүлбүт эрэ наада. Биир күн кофе ылан иһэртэн, остолобуойга, кафеҕа эбиэттииртэн туттуна түһүөххэ, 100 солкуобайы, 200 солкуобайы да буоллун, иэдээҥҥэ түбэспит ийэҕэ ыытыахха!

Үтүөнү оҥордоххо үс төгүл үксээн бэйэҕэр  эргиллэр дииллэр. Чахчыта да оннук.

Көмө буолар, күн аайы харчы ыытар дьоҥҥо ийэ махтала муҥура суох. Кыра-кыралаан наадалаах сууманы хомуйуохпут, Лиана дьоллоох оҕо саас диэни билиэҕэ!

Күн киһитэ көмүскэс, Айыы киһитэ аһыныгас!

Лиана ийэтин реквизиттэрэ:

Мобильный банк +7 964 429-87-43

? Сбербанк Львова Светлана Александровна 4276 7616 4810 5936 ?Алмазэргиэнбанк 4278 4300 0075 4925

? Тинькофф: 5536 9138 0537 7385

?ВТБ: 2200 2407 1993 2044

?АТБ: 5329 4758 9620 2790

?Яндекс кошелек: 4100 1157 1651 8537

Сбербанк для юр.лиц: Якутское отделение #8603 ПАО Сбербанк БИК 049805609 к/с 30101810400000000609 р/c 40817810676000427600

Инстаграм страница : @salievaliana

Сонуннар

Ордук ааҕаллар

Баһылык итирдэр утахтары атыылыыр быраабылаларга сыһыаннаах этии киллэрдэ
Сонуннар | 15.07.2021 | 13:00
Баһылык итирдэр утахтары атыылыыр быраабылаларга сыһыаннаах этии киллэрдэ
Куорат баһылыга Евгений Григорьев уопсастыбаннай аһыыр сирдэри кэҥэтэр уонна арыгы атыылыыр сирдэри социальнай эбийиэктэртэн тэйитэр туһунан этии киллэрдэ. Ол туһунан кини «Сахамедиа» медиа-кииҥҥэ ыытыллыбыт «Дополнительные ограничения времени, условий и мест розничной продажи алкоголя в Якутии» дискуссияҕа эттэ.  Баһылык ВОЗ дааннайдарынан арыгыттан сылтаан өлүү Арассыыйа 100 тыһыынча олохтооҕор ылан көрдөххө эр...
Дойдууна: «Сулус — халлааҥҥа, киһи — сиргэ»
Дьон | 17.07.2021 | 13:00
Дойдууна: «Сулус — халлааҥҥа, киһи — сиргэ»
Кинини  айылҕаттан ураты экстрасенс, сүппүт дьону булааччы быһыытынан сахалар эрэ буолбакка, өрөспүүбүлүкэ тас өттүгэр олорооччулар эмиэ билэллэр. Бүгүҥҥү кэпсиир дьоруойум “Саха сирин экстрасенстара – 2015” күрэххэ “Лучший экстрасенс Якутии” ааты сүкпүт ДОЙДУУНА. Дойдууна элбэх оҕолоох ыалга төрөөбүтэ, кинилэр бииргэ төрөөбүт тохсуолар. Хаҥалас улууһа киинэ түспүт, сиргэ үктэммит дойдута буолар. Ийэтэ...
Бары күүһү ойуур баһаардарын утары!
Сонуннар | 12.07.2021 | 11:30
Бары күүһү ойуур баһаардарын утары!
От ыйын 9 күнүгэр "Марха өрүс көмүскээччилэрин" түмсүүтэ Дьокуускай куорат общественниктарын, Ил Түмэн дьокутааттарын, СӨ бырабыыталыстыбатын, Дьокуускайдааҕы Дума, Общественнай Палата чилиэннэрин, суруналыыстары, блогердары, улуустар землячестволарын көҕүлээччилэрин, улуустар бэрэстэбиитэллэрин, бары тэрилтэ үлэһиттэрин кытта көрсөн Горнай, Ханалас уонна да атын улуустарга улахан ойуур баһаардара турбуттарынан, Бүлүү федеральнай суол кылгас кэмҥэ сабылла сылдьыбытынан...
Больничнай 100 бырыһыан төлөнөр буолла
Тускар туһан | 18.07.2021 | 11:30
Больничнай 100 бырыһыан төлөнөр буолла
8 саастарын туола илик оҕолор ыарыйдахтарына бэриллэр бүлүтүөн  төлөнүүтэ дьэ уларыйда.  Балаҕан ыйын 1 күнүттэн 8-тарыттан кыра саастаах оҕо ыарыйдаҕына, төрөппүтүгэр “больничнай илиис” төлөбүрэ хамнас 100%-гар тэҥнэһиэҕэ. Билигин бу төлөбүр үлэ ыстааһыттан эрэ тутулуктаах. Эдэр төрөппүттэр ыстаастара кыра буоллаҕына, «больничнай илиис» төлөбүрэ хамнастарынааҕар төһө эмэ кыра буолар.  “Больничнай” төлөбүрүн үрдээһинэ...