Үлэтэ суохтар босуобуйаларыгар уларыйыы киирдэ

Дьокуускай куорат прокуратурата үлэтэ суох дьон босуобуйаларын быраабылатыгар 2021 сылга уларыйыылар киирбиттэрин туһунан иһитиннэрэр. 
РФ Бырабыыталыстыбатын 2021 сыл кулун тутар 27 күнүнээҕи 454 №-дээх Уурааҕынан «РФ Бырабыыталыстыбатын 2020 сыл ахсынньы 31 күнүнээҕи 2393 №-дээх Уурааҕын 1-кы пуунун иккис абзаһыгар уларыйыылары киллэрэр туһунан» Уурааҕынан босуобуйа муҥутуур улахан кээмэйэ олохтонно.  

Ол курдук, сокуонунан көрүллүбүт босуобуйа муҥутуур улахан кээмэйэ – 12130 солкуобай –  үлэтэ суох босуобуйа ылар бастакы 3 ыйыгар төлөнүөҕэ.  Салгыы босуобуйа кээмэйэ 3 ый устата 5000 солкуобай буолуоҕа.
Уларыйыылар үлэлэрин араас биричиинэнэн сүтэрбит дьоҥҥо көмө буолуохтара.  Холобур, штат сарбыллан үлэлэрин сүтэрбит дьоҥҥо үлэлэриттэн 3 ый орто хамнас кээмэйин ылбыттарын кэннэ салгыы 3 ый үрдүк кээмэйдээх босуобуйаны ылаллар. Оҕо күүтэр үлэлэрин сүтэрбит дьахталлар декретнэй уонна үлэтэ суох буолуунан ылар босуобуйалара биир кэмҥэ түбэстэҕинэ, үлэтэ суох босуобуйата кэнники кэмҥэ көһөн биэрэр. 
Маны таһынан, үлэтэ суоҕунан босуобуйа ыла сылдьыбыт киһи байыаннай хомуурга бардаҕына, босуобуйа салгыы хомууртан кэлбитин кэннэ үрдүк кээмэйинэн төлөнөр. 
Уураах уларыйыылара 2021 сыл тохсунньу 1 күнүттэн учуокка турбут дьоҥҥо сыһыаннаах.