Ленин проспегын хапытаалынай өрөмүөнэ быйыл түмүктэнэр

Ол туһунан баһылык Евгений Григорьев бу нэдиэлэҕэ «ВКонтакте» социальнай ситимҥэ ыыппыт быһа эпииригэр кэпсээтэ.

«Хаачыстыбалаах уонна куттала суох суоллар» национальнай бырайыак иитинэн Дьокуускай куорат суолларын 66 % нуормаҕа сөп түбэһэр гына оҥоһулунна. Быйыл, 2023 сылга, үлэ 17 эбийиэккэ саҕаланар, онтон 10-на быйыл үлэҕэ киирэр, хаалбыт 7 эбийиэк кэлэр сылга түмүктэниэҕэ. Тутуллар суол уопсай иэнэ 22 км 626 м тэҥнэһэр.

Быйыл тутуллан бүтэр суолларга Ленин проспегын Хабаров уулуссатыттан Краснояров уулуссатыгар диэри 2 км 946 м усталаах кэрчигэ киирэр. Кулаковскай уулуссатын Краснояров уулуссатыгар (ыам ыйын бүтүөр диэри) уонна ЛОРП дьиэтиттэн Хабаров уулуссатын хайысхатынан икки учаастага оҥоһуллар.

«Ленин проспегар ыытыллыбыт претензионнай үлэ чэрчитинэн биллибит итэҕэстэри бэдэрээтчит көннөрүөхтээх. Онон балаҕан ыйын эргэтигэр Ленин проспега бүтүннүү саҥардыллыахтаах», - диэтэ баһылык.

Маны сэргэ быйыл Поярков уулуссатыгар Дзержинскэйтэн Октябрьскай уулуссаҕа диэри өрөмүөн ыытыллар, Бабушкин уулуссатыгар Сэбиэскэй Аармыйа 50 сыла уулуссаттан Очиченкоҕа диэри учаастакка баараҕай өрөмүөн күүтүллэр. Винокуров уулуссатыгар Ильменскэйтэн Чайковскай уулуссатыгар диэри кэрчик өрөмүөннэнэр.

Бүлүү переулогын өрөмүөнүн бастакы түһүмэҕэ саҕаланаары турар, быйыл 1,4 км усталаах суол оҥоһуллуоҕа, кэлэр сылга Объездной шоссеҕа тахсар суол былааннанар.

«Севернай» кыбаартал, Кузьмин уул., Островскай уул. өрөмүөннэниэхтэрэ, Табаҕаҕа Центральнай уулуссаҕа хапытаалынай өрөмүөн күүтүллэр.

Можайскай уонна Пилоттар уулуссаларын быһа охсуһууларыгар эбии балаһалар оҥоһуллуохтара, чуолаан Можайскай уулусса Марха диэки барыыта түөрт балаһаҕа диэри кэҥиирэ күүтүллэр.

Санатар буоллахха, «Хаачыстыбалаах уонна куттала суох суоллар» национальнай бырайыак Дьокуускай куорат территориятыгар 2019 сылтан ыытыллар. Бу сыллар усталарыгар 134 км усталаах суох өрөмүөннэннэ уонна саҥардылынна. Маныаха 8 млрд солкуобай туһаҕа таҕыста. Оттон сылларынан төһө усталаах суол оҥоһулунна диэтэххэ: 2019 – 26 км, 2020 – 23,5 км, 2021 – 48 км тахса,  2022 –36 км тахса. Бэлиэтээн эттэххэ, 2023 сылга 22 км тахса усталаах суол оҥоһуллаары турар.