Үлэлээбэт күннэргэ биэрэпис ыытыллыыта

Үлэлээбэт күннэргэ нэһилиэнньэ биэрэпиһин стационарнай учаастактарыгар   уустуктар баар буолуохтарын сөп. Үгүс учаастактар МФЦ дьиэлэригэр үлэлииллэр, оттон итилэр өҥөлөрүгэр үлэлээбэт күннэргэ хааччахтааһын киирэр.  
«МФЦ дьиэлэригэр баар биэрэпис стационарнай учаастактара региональнай былаастары кытта сөбүлэҥинэн үлэлиэхтэрэ», – диэн Росстатка иһитиннэрдилэр. Ол эрэн биэрэписчиктэр салҕыы дьиэлэринэн сылдьан суруйалларын тохтоппоттор. Росстат салайааччытын солбуйааччы Павел Смелов эппитинэн, биэрэписчиктэр пандемия усулуобуйатыгар үлэлииргэ эрдэттэн бэлэмнэммиттэр, бары быһыыны ылбыттар, кинилэргэ тус харыстаныы сириэстибэлэрин биэрэллэр. 
Арассыыйа олохтоохторо эрдэ этиллибитин курдук, «Госуслуги» портал нөҥүө биэрэпиһи электроннай көрүҥүнэн ааһыахтарын сөп. Бастакы нэдиэлэҕэ дойду үрдүнэн 14 мөл. олохтоох суруйтарбыт,  «Госуслуги» портал нөҥүө – 11 мөл. киһи.  
«Судаарыстыбаннай өҥөлөр нөҥүө биэрэпиһи ордук түргэнник ааһыахха сөп», – диир  Смелов. Кини иһитиннэрбитинэн, портал нөҥүө сурутуу болдьоҕун уһатыахтарын сөп. 
Биэрэпис бастакы нэдиэлэтигэр массыанньыктар биэрэписчик буолан кубулунан ыалга киирэ сатаабыт түбэлтэлэрэ биллибит. Дьон, биэрэписчик хайдах көрүҥнээх буолуохтааҕын билэр буолан сонно тута полицияны ыҥырбыттар. Биэрэписчиги массыанньыктан хайдах арааран билэбит? Биэрэписчик аналлаах атрибуттардаах: “Бүтүн Арассыыйатааҕы нэһилиэнньэ биэрэпиһэ” диэн суруктаах сэлиэччиктээх, итинник суруктаах саартаах, бэлиэлээх суумкалаах, нэһилиэнньэ биэрэпиһин ыытарга анаммыт планшеттаах, Роспотребнадзор ирдэбилин тутуһан харыстанар сириэстибэлээх. 
Суолталаах уратыта – биэрэписчик дастабырыанньалаах буолар. Дастабырыанньа пааспары кытта көрдөрүллүөхтээх. Биэрэписчик бэйэтин билиһиннэриэхтээх, туохха кэлбитин этиэхтээх, көрдөстөхтөрүнэ дастабырыанньатын уонна пааспарын көрдөрүөхтээх. Докумуоннарын көрдөрбөтөҕүнэ ыйытыктарыгар хоруйдуо, дьиэҕитигэр киллэриэ суоххутун сөп. 
Биэрэписчик пааспаргыт дааннайдарын, хамнаскыт төһөтүн, уурунуу харчыгытын, ким дьиэни бас билээччи буоларын, каартаҕыт нүөмэрин, бааҥҥа баар счеккутун ыйыппат. 
Павел Смелов эппитинэн, нэһилиэнньэ дааннайдара планшекка хаалбат, тута Росстатка бэриллэр. Планшекка суруллубут информацияны көҥүлэ суох ким даҕаны сатаан көрөр кыаҕа суох.