Үлэ, тыыл бэтэрээннэрин эҕэрдэлээһин

Өрдөөҥҥүтэ олохтоммут үгэһинэн, Саха Өрөспүүбүлүкэтин спорка миниистирэ Леонид Спиридонов, миниистири солбуйааччы Александр Бугаев, Физическэй култуура уонна спорт бэтэрээннэрин сэбиэтин бэрэссэдээтэлэ Гаврил Сивцев бэтэрээннэр олорор дьиэлэригэр тиийэн, өйдөбүнньүк бэлиэлэри, сибэкки дьөрбөлөрүн, сыаналаах бэлэхтэри туттартаатылар. Ааспыт үйэ 60-70-80 сылларыгар саҥа олоҕу тутууга, үүнэр көлүөнэни патриотическай тыыҥҥа иитиигэ, Саха сирин нэһилиэнньэтэ чэгиэн-чэбдик буолуутугар дьоһун кылааттарын киллэрбит билигин 90-чалаах аҕам саастаах бэтэрээннэргэ махталларын, ытыктабылларын биллэрдилэр. 
1966-1977, 1977-1986 сыллардаахха Саха Өрөспүүбүлүкэтин Спорка кэмитиэтин бэрэссэдээтэллэрэ Семен Иванович Алексеев, Афанасий Егорович Алексеев, спорт кэмитиэккэ өр сылларга инструктордаабыт Матрена Петровна Алексеева дьиэлэригэр-уоттарыгар үүттээх чэй иһэ олорон, иһирэхтик сэһэргэстилэр. Физкультура-спорт эйгэтигэр буолан ааспыт түгэннэри ахтан-санаан ыллылар. Оҥорбуттара, туппуттара-айбыттара үтүмэн үгүс.
Сэмэн Уйбаанабыс Алексеев көҥүл тустууга Саха сирин бастакы чөмпүйүөнэ. Нууччалыы-сахалыы уус-уран тылларынан чаҕылыҥнатан этэр улахан араатар. Өрөспүүбүлүкэ спорка кэмитиэтин салайан олорор кэмигэр тустууктарбыт Олимпийскай мэтээллэри аҕалтаабыттара. Дмитрий Петрович Коркин бастыҥ иитиллээччитэ Роман Дмитриев 1972 сыллаахха Мюнхеннээҕи Олимпийскай оонньуулартан сахалартан аан бастакынан кыһыл көмүс мэтээли аҕалан, Сахатын сирин аатырдыбыта, сахатын норуотун үөрдүбүтэ-көтүппүтэ, дьолу-соргуну түстээбитэ. 1976 с. Канада Монреаль куоратыгар ньиргийэн ааспыт Олимпийскай оонньууларга улуу тренер үс иитиллээччилэрэ: Павел Пинигин – кыһыл көмүс, Роман Дмитриев уонна Александр Иванов үрүҥ көмүс мэтээллэри ылаттаан, саха тустуутун чыпчаал өрөгөйө ситиһиллибитэ. 
Манчаары спартакиадаларын төрүттээн, спорт национальнай көрүҥнэрин сайдыытыгар сүҥкэн кылаатын киллэрбит, тыа сирин оройуоннарыгар үгүс спортивнай саалалар  тутуллууларыгар улахан кыахтары үөскэппит Афанасий Егорович Алексеев билигин даҕаны спорт министиэристибэтин коллегиятыгар, өрөспүүбүлүкэ спорка бэтэрээннэрин сэбиэтигэр сүбэтэ-амата элбэх. Хаамыынан-сүүрүүнэн сир шарын сэттэтэ эргийбит Афанасий Егорович күн бүгүнүгэр диэри хаамар, сиэлэр. Сэргэлээххэ баар даачатыттан үрдүк мырааны дабайар.
Олохторун физкультура уонна спорт сайдыытыгар анаабыт аҕам саастаах дьоммут  аныгы сайдыылаах ыччаттарбыт олимпийскай мэтээллэри аҕалалларыгар баҕа санааларын биллэрдилэр. Ытык бэтэрээннэр чэгиэн-чэбдик сырыттыннар, үйэлэрэ уһаатын!