03.12.2022 | 14:00

«Үлэ кыбаартала» — сайдыы территорията

«Үлэ кыбаартала» — сайдыы территорията
Ааптар: Айталина Софронова
Бөлөххө киир

Сэтинньи 23 күнүгэр өрөспүүбүлүкэ киин куоратыгар «Үлэ кыбаартала» креативнай индустрия технопааркатын кэтэһиилээх аһыллыыта буолла. Аныгылыы тупсаҕай тутуу 14 тыһ. кв. миэтэрэ иэннээх, биэс этээстээх. Манна Саха сирин креативнай индустрияларын бары салаалара киирэн үлэлиир кыахтаахтар. Барыта 150-тан тахса резидени хабыан сөп, 1250-тан тахса саҥа үлэ миэстэтэ тэриллэрэ былааннанар.

Кластерга туох баарый?

Киинэ, анимация уонна цифровой контент оҥоһуллуутугар анал устуудьуйа;

Лиэксийэлэри, кэпсэтиилэри, конференциялары, быыстапкалары уонна кэнсиэрдэри тэрийэн ыытарга улахан балаһаакка;

Үлэлиир офистар уонна производственнай салаа балаһааккалара.

Ханнык эйгэттэн резидент буолуохха сөбүй?

Киинэ;

Анимация;

Мультимедиа;

IT;

Цифровой контент уонна компьютернай графика;

Дизайн уонна графика;

Муода уонна кэрэ буолуу салаата;

Национальнай-художественнай оҥоһуктар.

Резиденнэргэ туох көрүллэрий?

Чэпчэтиилээх сыанаҕа офис куортамныахха сөп;

Туһааннаах оборудованиелары туттар кыах бэриллэр;

Лаунж-зонаҕа кэпсэтиилэри уонна мунньахтары тэрийэн ыытарга балаһаакка көрүллэр;

Улахан тэрээһиннэри ыытарга саалалары чэпчэтиилээх сыанаҕа куортамныахха сөп;

Резиденнэри сайыннарар, таһымнарын үрдэтэр тэрээһиннэргэ кыттар кыах бэриллэр;

Урутаан сайдыы икки территориятыгар – «Якутия» уонна «Южная Якутия» ТОР-га резидент үрдүк аатын ылан, үлэ таһымын өссө үрдэтиэххэ, киэҥ эйгэҕэ тахсыахха сөп.

 

Айар үлэ + бизнес

««Үлэ кыбаартала» – бу айар үлэ уонна бизнес салаатын силбэһэр сирэ. Манна айан, толкуйдаан  таһаарбыттара ырыынак бородууксуйатынан буолуохтаах. Саха сирэ – аан дойдуга биир бастыҥ мультимедиалаах, анимациялаах, киинэлээх, дизайннаах уонна да атын хайысхаларга иннники кирбиигэ сылдьар, үрдүк таһымнаах регионнартан биирдэстэрэ», – диэн бэлиэтиир Уһук Илини уонна Арктиканы сайыннарыыга миниистир Алексей Чекунков.

Кырдьыга даҕаны, Саха сирин урбаанньыттара, айан-тутан таһаарааччылара ырыынак эйгэтигэр омук тэрилтэлэрин кытта тэбис-тэҥҥэ күрэстэһэр, бэл диэтэр, сорох ардыгар хас даҕаны бүк баһыйар кыахтаахтар.

Бэртээхэй киин!

Саха сирин Ил Дархана Айсен Николаев бэлиэтииринэн, «Үлэ кыбаартала» креативнай индустриялары сайыннарыыга уонна олохтоох бородууксуйалары оҥорон таһаарыыга үрдүк чыпчааллары эрэннэрэр.

«Биһиги креативнай кластербытыгар биир тылынан элбэх тэҥнэбили, холобурдары даҕаны аҕалан этиэххэ сөп. Уһук Илин регионнарыгар аан бастакытын 14 тыһ. тахса кв. м иэннээх креативнай кластер арылынна. Урутаан сайдыы территориятыгар креативнай кластер аан бастакытын баар буолла, урут бу промышленнай эрэ хампаанньаларга тарҕанар этэ. Бу Арассыыйа Бэрэсидьиэнэ Владимир Путин хамаандата — Юрий Трутнев уонна Алексей Чекунков сыралаах үлэлэрин түмүгэ буолар. Аан бастакытынан федеральнай бүддьүөт үбэ Уһук Илин социальнай сайдыытын бырагырааматынан креативнай индустриялары сайыннарыыга анаммыт. Бүгүн биһиги чопчу манна, Дьокуускайга, бэртээхэй киин баар буолла диэн үөрэбит», — диэн бэлиэтээтэ Айсен Николаев.

Маны таһынан, Ил Дархан урукку эт комбинатын дьиэтэ иккис тыыны ылла диэн эбэн эттэ. Ол эбэтэр быраҕыллыбыт эбийиэк саҥардыллан, чахчы, аныгы үйэҕэ эппиэттиир гына оҥоһуллан, ыччат уонна аныгы киһи сайдар аартыгын арыйар.

Бүгүҥҥү күн туругунан номнуо 70-тан тахса резидент кластер иһигэр үлэтин саҕалаабыт.

«Билигин манна резиденнэр күн ахсын киирэ тураллар, офистары бэйэлэригэр табыгастаах гына оҥостоллор, онон үлэ өссө салҕанар. Сотору кэминэн 150 резидент киирэрэ былааннанар, өссө иккис эбийиэги креативнай кылаастарга тутуохпутун баҕарабыт, ол кыаллыа диэн эрэнэбин. Саамай кылаабынайа, манна төрүүр идеялар биһиги элбэх араас омуктаах дойдубут туһатыгар үлэлиэхтэрэ. Бэйэбит култуурунай суверенитеппытын көмүскээтэхпитинэ, биһиги дойдубут инники кэскилэ кэҥиэ», — диэтэ өрөспүүбүлүкэ Ил Дархана.

 

Резиденнэри ыҥырабыт

Саҥа креативнай кластерга хайдах гынан сайаапка биэриэххэ сөбүн ыйыталаһаары, төһө элбэх хампаанньа үлэлии олорорун билсээри, бырайыактары салайар исписэлиис Ольга Антипиналыын кэпсэттибит.

Ольга, дорообо! «Үлэ кыбаартала» туһунан кылгастык кэпсии түһэриҥ буоллар.

«Үлэ кыбаартала» креативнай индустрия эйгэтигэр технопаарка буолар. Кластер 1976 сыллаахха тутуллубут эргэ производственнай дьиэ баазатыгар тутулунна.

Резиденнэринэн 150 хампаанньа буолла, ол эбэтэр 1250 үлэ миэстэтэ таҕыста. Кластер резиденнэрин тутаах хайысхалара – киинэ, анимация, медиа, цифровой контент уонна дизайн. Кластерга профессиональнай оборудованиелар бааллар: XR киинэ оҥоруутугар виртуальнай кинопродакшн, “хромакей” павильон “цветокоррекция” устуудьуйата, “3Д-анимация”, уоттаах-күөстээх хостор уо.д.а.

Ону сэргэ араас халыыптаах офистар уонна производственнай хостор. Лекциялары, кэпсэтиилэри, конференциялары, быыстапкалары уонна кэнсиэрдэри ыытар анал саалалардаахпыт.

Үлэ кластера куорат олохтоохторун уонна ыччаттарын саҥа бырайыактарын олоххо киллэрэргэ уонна креативнай бизнес сайдарыгар төһүү булуоҕа.

Резидент буолар баҕалаахтар тугу гыныахтаахтарый, туох ирдэбил баарый?

Бастатан туран, «Үлэ кыбаартала» креативнай кластер бэйэтин  сайтыгар www.kvartaltruda.com/ анкетаны толоруохтаахтар. Манна локацияны ордук чуолкайдык быһааран, төһө кээмэйдээх офиска наадыйалларын ыйаллара ирдэнэр. Бэлиэтээн эттэххэ, креативнай индустрия предпринимателлэрэ бырайыак оҥоһуллуутугар уонна былааннааһыҥҥа урбаанньыттар интэриэстэрэ учуоттаммыта. Онон хампаанньаларга табыгастаах офистар, хостор бааллар. Саҥа киирэн үлэлиэн баҕалаах тэрилтэлэргэ сайаапкалары түҥэтиини сэбиэт быһаарар.

Резидент статуһун ылан, хампаанньа ханнык чэпчэтиилэри ыларый?

Кластер резиденигэр креативнай кластеры туһаныыга чэпчэтии көрүллэр. Ону сэргэ бизнес резиденнэрин тэтимнээхтик сайыннарарга усулуобуйа тэрилиннэ.

Куортам сыаната төһөнүй?

Кластер резиденигэр ырыынак ыстаапкатыттан кыра кээмэйдээх буолар. Ол эрээри чэпчэтиилээх ыстаапканан креативнай эйгэлээх бизнес салаалара туһанар кыахтаахтар.

Биһиги предпринимателлэр саамай сүрүн ирдэбиллэрин олоххо киллэриэхпитин баҕарабыт, ол инниттэн предпринимателлэр бииргэ үлэлииллэригэр уонна түмсэллэригэр кыах бэриллэр.

Саҥа тутуллубут тупсаҕай эбийиэк Дьокуускай куорат Промышленнай уокуругар баар. Аадырыһа: Труд уул., 1, электроннай почта: kvartal_truda@mail.ru.

 

Хаартыскалар интэриниэт ситимиттэн ылылыннылар

Сонуннар

Ордук ааҕаллар

Замполит Александр:  «Эр санаалаах боотурдары төрөтөр Саха сиригэр сүгүрүйэбин»
Дьон | 12.07.2024 | 12:00
Замполит Александр: «Эр санаалаах боотурдары төрөтөр Саха сиригэр сүгүрүйэбин»
Бу сурук кэлбитин туһунан миэхэ Уус Алдан улууһун социальнай политика салаатын үлэһитэ, хаһыаппар сырдаппыт, анал байыаннай дьайыы саҕаланыаҕыттан үлэлии сылдьар Наталья Охлопкова от ыйын 3 күнүгэр эрийэн, хаһыаккар таһаарыаҥ дуо диэбитин тута сөбүлэспитим. Онон, сурук хайдах баарынан тылбаастаан, ааҕааччыларбар тиэрдиэм, Саха сирэ дьоруойдарын билиэхтээх!   “Наталья, дорообо! Мин аатым Александр. Мин...
Мария Мигалкина:   «Кэлии сиэмэлэринэн үлүһүйүмэҥ»
Дьон | 19.07.2024 | 10:00
Мария Мигалкина: «Кэлии сиэмэлэринэн үлүһүйүмэҥ»
Мин бүгүн ааҕааччыларбар, ордук хаһаайкаларга, 35 сыл үлэлээбит уопуттаах агроном, билигин биэнсийэлээх, дойдутугар сайылыы сылдьар Мария Семеновна Мигалкинаны кытта тэлгэһэтигэр тиийэн, үүнээйитин, сибэккитин көрө-көрө, дуоһуйа, астына кэпсэттим.   Сибэккигэ уоҕурдууну хото туттабын Бастатан туран ааҕааччыларга циния диэн сибэкки туһунан кэпсиэҕим. Урут биһиги “Циния обыкновенная” диэни олордор этибит, билигин “Циния кустовая” диэн...
Дьулустаан Ноговицын: ДЬУЛУС! ТУЛУС! КЫАЙ!
Дьон | 11.07.2024 | 10:00
Дьулустаан Ноговицын: ДЬУЛУС! ТУЛУС! КЫАЙ!
«Киин куорат» хаһыат бүгүҥҥү ыалдьыта – Туймаада туонатын Үрүҥ Тунах ыһыаҕын «Дыгын оонньуулара» күөн-күрэһин Таас Боотура, быйылгы күрэх муҥутуур кыайыылааҕа Дьулустаан Ноговицын.   Дьулустаан Ноговицын: – Дьокуускай куорат 1№-дээх баһаарынай чааһын байыаһа, төрөппүттэригэр соҕотох уол, эдьиийигэр быраат, тапталлаах кэргэн, үс оҕо амарах аҕата; – Мас тардыһыытыгар Саха Өрөспүүбүлүкэтин, Арассыыйа уонна аан...
Изабелла Попова: Сүрэхпэр сөҥөрбүт дьүөгэлэрим
Дьон | 19.07.2024 | 12:00
Изабелла Попова: Сүрэхпэр сөҥөрбүт дьүөгэлэрим
Арассыыйа үөрэҕириитин туйгуна, Саха сирин үөрэҕириитин бочуоттаах үлэһитэ, хас да кинигэ ааптара Изабелла Ильинична Попова бүгүн өрөгөйдөөх үбүлүөйүн көрсө өссө биир кинигэтин сүрэхтиир. Дьэ, кырдьык, сүрэхтиир... Сүрэҕин сылааһын иҥэрбит кинигэтин!   Ахтар-саныыр дьүөгэлэрим, Аламаҕай сэгэрдэрим, Саһарҕалаах сарсыардабын Сандаарытар куоларым!   Сүр... Сүрэх, сүрдээх, сүрэхтиир... Сахабыт тыла барахсан тугун бэрдэй! Биир тылтан силистэнэн-мутуктанан...