Үлэ, Эйэ, Маай бырааһынньыга Дьокуускайга

Ыам ыйын 1 күнэ сэбиэскэй кэм саҕаттан сыллата араас идэлээх, саастаах дьону сомоҕолуур, үлэнэн иитиллэр норуоту өрө тутар, эйэлээх, түмсүүлээх буолууну айхаллыыр сэлэлии хаамыынан бэлиэтэнэн кэлбитэ.

Быйылгы, 2024 сыллааҕы, Үлэ, Эйэ, Маай бырааһынньыга, дойдуга буола турар уустук балаһыанньанан, сэлэлии хаамыыта суох буолла.

Ол да буоллар куорат Орджоникидзе аатынан уонна Доҕордоһуу болуоссаттарыгар норуот күүлэйэ тэрилиннэ. Холобура, Орджоникидзе болуоссатыгар уус-уран кэлэктииптэр күүстэринэн кэнсиэр, «Тэтим» араадьыйа бырагыраамата, оһуохай, Доҕордоһуу болуоссатыгар Суорун Омоллоон аатынан Опера уонна балет тыйаатырын солистарын, М.Е. Николаев аатынан Медицина национальнай киинин кэлэктиибин кэнсиэртэрэ, о.д.а. киэҥ хабааннаах култуурунай бырагыраамалар кэлбиккэ эрэ барытыгар бырааһынньыктааҕы настарыанньаны бэлэхтээтилэр.

Икки болуоссатынан оҕолорго, ыччакка аналлаах туспа айар, оонньуур балаһааккалар, күрэхтэһиилэр тэриллибиттэрэ кэрэхсэбиллээх. Кырачааннар викториналарга, кинигэ лотереятыгар, спортивнай күрэхтэһиилэргэ көхтөөхтүк кыттан, бириистэринэн бэлиэтэннилэр.

— 1 Маай бырааһынньыгар биһиги үгэс курдук куораппыт, өрөспүүбүлүкэбит, бүтүн дойдубут экономикатын, социальнай эйгэтин сайыннарыыга үрдүк кирбиилэри ситиһэр үлэһит дьоммутун чиэстиибит. Махтал истиҥ тылларынан Дьокуускай куоракка «Килбиэннээх үлэ куората» үрдүк аат иҥэриллэригэр көлөһүннэрин тохпут, сыраларын уурбут, олох очурдарын ааспыт ытык кырдьаҕастарбытын, бэтэрээннэрбитин ахтан ааһабыт. Бүгүн биһиги сарсыҥҥы кэнчээрибит, үүнэр көлүөнэбит — күүстээх үлэлэринэн дойдубутун өссө күүһүрдүөхтээх устудьуоннарбыт, оскуола үөрэнээччилэрин диэки эрэнэ көрөбүт, — диэн Дьокуускай куорат баһылыга Евгений Григорьев куорат бары олохтоохторугар туһаайан эҕэрдэлээтэ.

Диана Яковлева, куорат олохтооҕо:

— Бырааһынньык биир-икки миэстэҕэ буолара олус табыгастаах диэн көрдүм. Халлаан сылыйан, күн тыган, киһи эрэ үөрүөх-көтүөх курдук. Араас оонньуулар, кэнсиэр буола турара настарынньаны өссө күүскэ көтөҕөр. Култуурунай бырагырааманы таһынан оҕолор эстафеталарын сэргээтим. Бэйэм Губинскай уокурук олохтооҕо буоларым быһыытынан, уокуругум оҕолорун өйөөтүм.

Күөх Маайы уруйдуур-айхаллыыр бырааһынньык үгэс буолбут оһуохай үҥкүүнэн түмүктэннэ.