Үлэ биэрээччилэр тус сыаллаах миэстэ туһунан иһитиннэриэхтэрэ

Саха сиригэр бэс ыйын 20 күнүгэр орто уонна үрдүк үөрэхтэргэ докумуоннары тутуу саҕаланар. Сыл аайы үөрэххэ туттарсыыга уларыйыылар киирэллэр.

Ол курдук, быйыл үлэ биэрэр тэрилтэлэр «Арассыыйаҕа үлэ» саайтыгар тус сыаллаах үөрэх миэстэтин туһунан иһитиннэриилэри таһаарыахтара. Бэлиэтээн эттэххэ, бу күннэргэ оскуоланы бүтэрээччилэр математика уонна нуучча тылын биир кэлим эксээмэннэрин туттардылар.

Саха сиригэр 2024-25 үөрэх дьылыгар федеральнай бүддьүөт суотугар 923 тус сыаллаах үөрэх миэстэтэ көрүлүннэ, онтон өрөспүүбүлүкэ бүддьүөтүн суотугар – 785 миэстэ.

«Үлэ биэрээччи тэрилтэҕэ ханнык каадыр тиийбэтин туһунан «Арассыыйаҕа үлэ» платформаҕа киллэриэхтээх уонна тус сыаллаах үөрэххэ туттарсыыга усулуобуйа тэрийиэхтээх”,– диэн быһаарда өрөспүүбүлүкэ үөрэҕин уонна наукатын миниистирэ Ньургуна Соколова.

Үлэ биэрээччи абитуриены кытта тус сыаллаах дуогабары түһэрсэр санаалаах буоллаҕына, «Арассыыйаҕа үлэ» цифровой платформаҕа бэс ыйын 10 күнүгэр диэри биллэрииитн таһаарыахтаах.

Нэһилиэнньэ дьарыктаах буолуутугар судаарыстыбаннай кэмитиэт иһитиннэрбитинэн, «Арассыыйаҕа үлэ» порталга бу ый саҥатыгар өрөспүүбүлүкэ үрдүнэн 10 758 үлэ миэстэтэ баара биллэр. Манна даҕатан эттэххэ, ордук оробуочай идэлэр баһыйаллар. Саамай элбэх үлэ миэстэтэ доруобуйа харыстабылын эйгэтигэр, социальнай өҥөлөрү оҥорууга, үөрэхтээһиҥҥэ, промышленнай тэрилтэлэргэ баар.

Үлэ ырыынага ордук суоппар, слесарь, электромонтер, электросварщик, оробуочай, повар, электрогазосварщик, ыарахан кыамталаах оборудованиелар оператордара курдук идэлээх исписэлиистэргэ наадыйар. Ону таһынан сорох тэрилтэлэр инженер, маастар, биэлсэр, механик, харабыл курдук идэлээх каадырдары күүтэллэр.