Лабораторияларга 5 мөл.солк. ыытыахтара

Биэс мөлүйүөн солкуобай кэриҥэ харчыны Саха сирин лабораторияларыгар ыыталларын туһунан суһал штаб салайааччытын солбуйааччы Ольга Балабкина сэтинньи 2 күнүнээҕи брифинигэр иһитиннэрдэ.

Алтынньы 31 күнүгэр бырабыыталыстыба федеральнай бүддьүөттэн быраастарга үп ыытар туһунан сөбүлэһиигэ илии баттаата. Эбиитин өссө биир сөбүлэһии чэрчитинэн 36 мөлүйүөн солкуобай коронавирус эмигэр көрүллүөҕэ. «Бу нэдиэлэҕэ тустаах эмп атыылаһан, босхо эмтээн саҕалыахтаахпыт. Ону таһынан быраастарбыт Арассыыйа пульмонологиятын семинарыгар кытыннылар, саҥа уопут ыллылар», — диэтэ Ольга Балабкина. Билигин коронавируһу быһаарыыны түргэтэтиигэ үлэ ыытыллар диэн отчуоттаата.