Өлүөнэ очуостарыгар бүтэһик баһаар бохсулунна

«Өлүөнэ очуостара» национальнай паарка территориятыгар баар улахан баһаар бохсулунна. Миэстэтигэр атын көрдүгэннэр күөдьүйбэттэрин курдук ЫБММ эбии бөлөҕө үлэлиир. 
«Өлүөнэ очуостара» национальнай паарка – «ЮНЕСКО» аан дойдутааҕы нэһилиэстибэтин эбийиэгэ, Арассыыйа ЫБММ ураты хонтуруолугар сылдьар. Атырдьах ыйын 19 күнүгэр паарка территориятыгар РФ ЫБММ регионнааҕы управлениетын бөлөҕө кэлбит, биэдэмистибэ баһылыгын бастакы солбуйааччыта Александр Чуприян паарка территориятын авиациянан кэтээн көрбүт. 
Паарка территориятыгар баһаар бэс ыйын 27 күнүттэн умайар. Паарка дириэктэрэ Аркадий Семенов бэлиэтээбитинэн,  баһаары умуруорууга ыарахан тиэхиньикэни туттуу сатаммата усулуобуйаны уустугурдан биэрбит. Биир күн инники паарка сотрудниктара уонна баһаары умуруорааччылар «Өлүөнэ очуостара» территориятыгар өссө биир баһаары бохсубуттар.