«Өлүөнэ очуостара» национальнай паарка билиҥҥи туруга

«Өлүөнэ очуостара» национальнай паарка дириэктэрэ Аркадий Семенов паарка территориятыгар ойуур баһаарыгар билиҥҥи балаһыанньа туһунан иһитиннэрдэ. 
«Атырдьах ыйын 6 күнүгэр күүстээх тыал түһэн баһаар көрдүгэннэрин күөдьүтэн таһаарда. Баһаартан сэрэхтээх буолуу кэмэ саҕаланыаҕыттан паарка территориятыгар 11 баһаар турбута. Урукку сылларга хаһан да маннык буолбат этэ. Ити төрдө – ураты кураан сайын. Биирдэ да ардах түспэтэҕэ, зондировщик-сөмөлүөт түһэрбит ардаҕын аахпатахха», — диир дириэктэр.
Аркадий Семенов эппитинэн, бүгүҥҥү күҥҥэ национальнай пааркаҕа икки баһаар баар, барыта 9 баһаар көрдүгэнэ умуруоруллубут. Буотама өрүһүнэн устууттан ураты пааркаҕа сылдьарга хааччахтааһын суох. 
Гидтар уонна паарка сотрудниктара дьон кэллэҕинэ маасканы кэтэллэрин уонна санитарнай-эпидемиологическай ирдэбиллэри тутуһалларын туһунан санаталлар. 
Аркадий Семенов эппитинэн, паарка территориятыгар кыыллар аһыылларыгар анаан учаастактары оҥорбуттар. Баһаар кэмигэр бөдөҥ кыыллар эрдэттэн куоталлара, кыралар быыһамматтара, ол эрэн ахсааннара түргэнник чөлүгэр түһэр кыахтааҕа этилиннэ.