«Өлүөнэ очуостара» национальнай пааркаҕа үс баһаары парашютист-десантниктар тохтоппуттар

«Өлүөнэ очуостара» национальнай пааркаҕа ойуур баһаарын төрүөтүнэн ардаҕа суох кураанах этиҥнэр буолбуттар диэн этэллэр «Авиациянан ойууру харыстыыр» ФБТ. 
ЮНЕСКО испииһэгэр сылдьар ураты айылҕалаах территорияҕа Федеральнай, Тыва, Хабаровскай, Забайкальскай уонна Свердловскай Авиациянан ойууру харыстыыр ФБТ 159 парашютист-десантниктара көмөҕө кэлбиттэр.  Киһи сылдьарыгар уустук сирдэргэ, күүстээх тыал кэмигэр Авиациянан ойууру харыстыыр тэрилтэ этэрээтэ аҥаардас кыһыл илиинэн 4,9 тыһ. га сиргэ 3 баһаары тохтоппут. 
Бэҕэһээ күнү быһа парашютист-десантниктар салгыы умуруорааһыҥҥа үлэлээбиттэр, онно эбии икки баһаары тохтоторго киирсэллэр. 
Ааспыт сууккаларга кинилэр тастан көмөлөһөөччүлэри кытта 65, 3 тыһ га сири барбыт 2 улахан баһаары, итини сэргэ Саха сирин ойуурун пуондатын 7,8 га сиригэр 13 баһаары тохтоппуттар. 
Бүгүҥҥү күҥҥэ Саха сиригэр уоту кытта 2 тыһ. тахса киһи, ол иһигэр 1 тыһ. кэриҥэ Федеральнай, Дьокуускайдааҕы уонна 12 регион Авиациянан ойууру харыстыыр тэрилтэ парашютист-десантниктара уонна 300-тэн тахса тиэхиньикэ үлэлииллэр. 
Ойуур баһаара буола турар сирдэригэр парашютист-десантниктары уонна тэриллэрин таһарга  Ми-8 бөртөлүөттэр көтөллөр. 
Баһаары намыратар сыаллаах Федеральнай Авиациянан ойууру харыстыыр тэрилтэ Ан-26 зондировщик сөмөлүөт көмөтүнэн ардаҕы түһэртэрэр.