13.05.2022 | 15:00

Кыайыы эстафетатыгар күлүбүрэс сүүрүүлэр

Кыайыы эстафетатыгар күлүбүрэс сүүрүүлэр
Ааптар: Баһылай ПОСЕЛЬСКАЙ
Бөлөххө киир

Үтүө үгэскэ кубулуйбут Кыайыы эстафетата икки сыллаах пандемия тохтобулун кэнниттэн уонна быйыл Дьокуускай куорат киин уулуссалара өрөмүөннэнэ туралларынан, Н.Н. Тарскай аатынан “Туймаада” стадиоҥҥа буолан ааста. Куорат үлэҕэ кэлэктииптэрин  сэттэ хамаандата илин-кэлин түһүстэ.

Маҥнайгы эстафета Аҕа дойду сэриитэ буола турдаҕына, 1944 сыл ыам ыйын 7 күнүгэр, тэриллибитэ. Ол историяҕа киирбит эстафетаҕа “Учууталлар”, “Димамо” уонна финансовай-экономическай техникум хамаандалара кыайбыттара. Ити кэмтэн ыла элбэх сыл-хонук ааста. Кыайыы эстафеталарын үгүс геройдара баар буоллулар.

Быйылгы эстафета кыттыылаахтарын “Якутия” хаһыат сүрүн эрэдээктэрэ Елена Карпова, Бойобуой дьайыылар Саха сиринээҕи тэрилтэтин бэрэссэдээтэлэ, бойобуой уордьан кавалера Иван Черкашин эҕэрдэлээтилэр. Сүрүн судьуйанан 1 №-дээх оҕо спортоскуолатын тренерэ Сергей Гуляев үлэлээтэ. Тымныы, киһини курдаттыы үрэр хаҕыс тыаллаах, былыттаах күн күрэхтэһээччилэри салыннарбата. Үөрэ-көтө бырааһынньыктыы, күрэхтэһэ кэлбит быһыйдар эрчиллэн-хамсанан, эттэрин-хааннарын сылытан, стадиону тула сүүрэн тэйдилэр, өрүтэ ыстаҥалаатылар. Кинилэр ортолоругар биллиилээх сүүрүктэр, Арассыыйа чөмпүйүөннэрэ уонна призердара Наталья Леонтьева, Диана Адасько, Александр Нечаев, Арассыыйа, Европа, аан дойду рингэлэрин кикбоксиҥҥа кыайыылааҕа Вадим Колтовской уо.д.а. бааллар.

Маҥнайгы сүрүн түһүмэх ыһыылаах-хаһыылаах күлүмэх сүүрүүтүгэр Ньурба Мэгэдьэгин быһыйа, Чурапчытааҕы физкультура уонна спорт институтун бүтэрбит, билигин Дьокуускайга оҕо уһуйааныгар инструктордыыр Кэскил Николаев бастаата. Хамаанданан түмүккэ Олимпийскай солбук оҕо спортоскуолаларыттан – Н.С. Тимофеев аатынан Нам спортоскуолатын тренердэрэ Эдуард Дьяконов, Диана Тартакынова, Д.П. Коркин аатынан Чурапчытааҕы спортоскуола инструктор-методиһа Марианна Макарова (Иванова), Өрөспүүбүлүкэ сүүмэрдэммит хамаандатын бэлэмниир киин сиэстэрэтэ Людмила Узорова, тренер Вадим Колтовской, Манчаары аатынан спорт национальнай көрүҥнэргэ киинин тренердэрэ Ким Иванов, Василий Чичахов, Олимпийскай солбугу бэлэмниир киин аналитик-методиһа Наталья Чиряева быһыйдардаах Саха Өрөспүүбүлүкэтин физическэй култуураҕа уонна спорка министиэристибэтин хамаандата бастаата. Дьокуускай куораттааҕы Үөрэх управлениета – иккис, куорат Физическэй култуураҕа уонна спорка управлениета үһүс бириистээх миэстэлэргэ тигистилэр. Өйдөбүнньүк мэтээллэр, кубоктар, дипломнар уонна туһааннааҕынан 30, 20, 10 тыһыынчалаах харчынан сертификаттар туттарылыннылар.

Эстафетаны тэрийээччилэр саамай сөпкө бэлиэтээбиттэринэн, күрэхтэһиигэ кыттыыны ылбыттар – спордунан дьарыктаналларынан, физкультураны, спорду пропагандалыылларынан, чөл олоҕу тутуһалларынан бука бары кыайыыны ситистилэр!

Сонуннар

Ордук ааҕаллар

Сыана үрдээһинэ
Сонуннар | 22.03.2024 | 18:00
Сыана үрдээһинэ
(2024 сыл олунньу ыйдааҕы көрдөрүүтүнэн)
Сергей:  «Уолаттар санаалара-оноолоро харахтарыгар көстөр»
Дьон | 21.03.2024 | 18:00
Сергей: «Уолаттар санаалара-оноолоро харахтарыгар көстөр»
Оҕо сылдьан разведчиктаах киинэлэри умсугуйан көрөрбүт, кинилэр курдук буолуохпутун баҕаран, сэриилээх оонньуурбут, саһа, сыбдыйа, сыылла сылдьан өстөөхтөрбүтүн самнарарбыт.  Разведчик диэн тылы иһиттэхпинэ, тута харахпар Штирлиц уобараһа көстөр. Кини өстөөхтөр уйаларыгар тиийэн, былааннарын, дьайыыларын биһиги дьоммутугар тиэрдэн, кыайыыны ситиһэргэ улахан кылаатын киллэрсэр.   Ол аата дьиҥнээх разведчик хайдах буолуохтааҕый? Кини боростуой саллаат...
Социальнай биэнсийэ эбиллэр
Сонуннар | 16.03.2024 | 18:00
Социальнай биэнсийэ эбиллэр
Муус устар 1 күнүттэн социальнай биэнсийэ 7,5 бырыһыан үрдүүр. Бу туhунан 262 N-дээх уурааҕы кулун тутар 5 күнүгэр Арассыыыйа Бырабыыталыстыбата бигэргэттэ. Индексация кээмэйэ ааспыт сылга биэнсийэлээхтэргэ олох таһымын алын кээмэйин улаатыытынан ааҕыллар. Бу төлөбүргэ анаан социальнай пуонда бүддьүөтүгэр 37,5 млрд солк. көрүлүннэ. Статитстика көрдөрөрүнэн, Арассыыйаҕа 4 мөлүйүөнтэн тахса киһи социальнай...
Рулет арааһын астыахха
Тускар туһан | 23.03.2024 | 10:00
Рулет арааһын астыахха
Бүгүн ааҕааччыларбытыгар астыырга чэпчэки уонна судургу, ол эрээри олус минньигэс уонна тотоойу сокуускалар ырысыаптарын бэчээттиибит. Бырааһынньыктааҕы сандалыгытын киэргэтиэхтэрэ, өрөбүллэргэ сонун бүлүүдэ буолуохтара.