Кыаммат ыалга өссө биир көмө

Муус устар 1 күнүттэн кыра дохуоттаах уонна 8-тан 17-гэр диэри саастаах оҕолордоох дьиэ кэргэн саҥа босуобуйа ылар кыахтанар.

Саха сиригэр бу көмөнөн, барыллаан ааҕыынан, 41 000 оҕо туһаныахтаах.

Саҥа босуобуйа базовай суумата – олох таһымын алын кээмэйин аҥаарыгар тэҥнэһэр.

Босуобуйаны дьиэ кэргэн дохуота биир киһиэхэ үллэһиллэн олох таһымын алын кээмээйиттэн кыра буоллаҕына эрэ ылар бырааптаах. Ыал дохуотуттан, олорор зонатыттан көрөн, оҕоҕо 9 728 солк. саҕалаан 23 229 солк. тиийэ ылыахха сөп буолуоҕа.

Сайабылыанньаны 3-7 саастаах оҕоҕо босуобуйа ыларгытыгар толорбуккут курдук оҥороҕут. Ыам ыйын 1-кы күнүттэн Судаарыстыбаннай өҥөлөр порталларыгар уонна МФЦ-га тиийэн толоруохха сөп. Босуобуйа ыларгыт бигэргэннэҕинэ, икки ыйдааҕыны – муус устар уонна ыам ыйын харчытын холбоон бэриллэр.

Эмиэ 3-7 саастаах оҕолорго көрүллэр босуобуйа курдук, дьиэ кэргэн дохуотуттан көрөн, олох таһымын алын кээмэйин 50-75-100 бырыһыана диэн суоттанар.

2022 сылга саҥа босуобуйа кээмэйэ эргимтэлэринэн:

1-гы эргимтэ – Абый, Аллайыаха, Анаабыр, Булуҥ, Үөһээ Халыма, Дьааҥы, Эдьигээн, Муома, Аллараа Халыма, Өймөкөөн, Өлөөн, Орто Халыма, Усуйаана, Эбээн-Бытантай, Айхал уонна  Удачнай бөһүөлэктэрэ:

- 50% – 11 614 солк. 50 харчы;

- 75% – 17 421 солк. 75 харчы;

- 100% – 23 229 солк.

2-с эргимтэ – Алдан, Амма, Үөһээ Бүлүү, Бүлүү, Горнай, Кэбээйи, Ленскэй, Мэҥэ Хаҥалас, Мииринэй, Нам, Нерюнгри, Ньурба, Өлүөхүмэ, Сунтаар, Таатта, Томпо, Уус Алдан, Уус Майа, Хаҥалас, Чурапчы уонна Дьокуускай:

- 50% – 9 728 солк. 50 харчы;

- 75% – 14 592 солк. 75 харчы;

- 100% – 19 457 солк.