“КЫҺЫН ДЬОЛЛООХ ДЬОҤҤО ИЧИГЭС” ХААРТЫСКАНАН КҮРЭХ

Күрэх балаһыанньата:

«Киин куорат» хаһыат пандемияны сэргэхситэр аналлаах «Кыһын дьоллоох дьоҥҥо ичигэс” диэн хаартысканан күрэҕин салгыы ыытар. Ким баҕалаах, сааһынан хааччаҕа суох кыттар.

Саамай сүрүнэ – эһиги кыһыҥҥы дьарыккытын көрдөрүөхтээххит: таһырдьа сүүрэ, хаалыктаах хаама, сөтүөлүү, балыктыы, хайыһардыы, дрифтии сылдьаргытын, о.д.а.

Күрэх сүнньүнэн инстаграм социальнай ситимҥэ ааһыаҕа. Хаартыскаларгытын #КЫҺЫНДЬОЛЛООХДЬОҤҤО диэн хэштегинэн бэлиэтээтэххитинэ, биһирээбит хаартыскаларбытын хаһыаппытыгар таһаарыахпыт эбэтэр  8-967-624-61-68 бассаап нүөмэригэр ыытаҕыт.

Салгыы кыттааччыларбытын кытта билсиэҕиҥ.

Елизавета Терентьева, Бүлүү улууһун Кыргыдай нэһилиэгэ:

• Күннээҕи түбүктэн сынньанабыт, таарыйа айылҕалыын алтыһабыт.

Афанасий Винокуров, Кэбээйи улууһа:

• Тымныыны аахсыбакка, муус аннынан Ньидьили эбэҕэ кэргэммин кытта илимнээн кэллибит. Саха дьоно сылдьа үөрүйэхпит.

Оксана Игнатьева, Чурапчы улууһа:

• Эти-сиини эрчийии – доруобуйа  төрдө. Быйыл хаалыктаах хаампыппыт  ахсыс сылыгар барда, нэдиэлэҕэ үстэ 8 км хаамабыт. Кэмиттэн кэмигэр “Сканди-трип” диэн сөбүлүүр тэрээһиннээхпит.  Атын күннээҕэр икки-үс төгүл ырааҕы барабыт.

Антонина Сметанина, Дьокуускай куорат:

• Сардаана Ядреева салайааччылаах «Ыллык” бөлөх. Хаартыскаҕа: Баһылай Манчаары аатынан спорт национальнай көрүҥнэрин комплексын тренерэ Надежда Белолюбская хабылыкка маастар-кылааһа.

Чурапчы улууһун хаалыктаах хаамааччылара:

• Чурапчы сэлиэнньэтигэр “Куоҕалы сканди” хаалыктаах хаамыы түмсүүтэ 2018 с. тэриллибитэ. Биһиэхэ аан маҥнай хаалыктаах хаамыыны В.Е. Александров саҕалаабыта.  Билигин түмсүү 16 чилиэннээх. Ханнык баҕарар кэмҥэ сайыннары-кыһыннары сибиэһэй салгыҥҥа хаамабыт, сэрээккэлиибит. Бары тутуспутунан сайынын сөтүөлүүбүт, күнү көрсөбүт, сир астыыбыт, араас кэрэ-бэлиэ сирдэргэ сылдьарбытын сөбүлүүбүт.

Вера Атласова, Абый улууһа:

• Хоту дойду хоһуун дьоно дьыл ханнык да кэмин, тыйыс айылҕатын аахсыбаттар. Бэйэм 62 саастаахпын, хаалыктаах хааман турукпун тупсарабын.

Милана Стручкова, Үөһээ Дьааҥы улууһа:

• Хоту дойду оҕолоро

Чаҕыйбаттар тымныыттан,

Халыҥ хаары хардыылаан

Ойуоккалыы сырсаллар.

Любовь Малькова, Үөһээ Дьааҥы улууһа:

• Сибиэһэй салгыҥҥа көччүйэ көтүөххэ.

Маргарита Перевалова, үлэ бэтэрээнэ, чөл олох, «Чэгиэн” хаалыктаах хаамааччылар түмсүүлэрин салайааччыта, Мэҥэ Хаҥалас, Хаатылыма:

• Биһиги бөһүөлэкпитигэр биир интэриэстээх чөл олоҕу тутуһар, хаалыктаах хаамыынан дьарыктанар түмсүүбүт тэриллибитэ  сэттис сылыгар барда. Дьыл кэмиттэн тутулуга суох, хаһан баҕарар хаамабыт. Бассаап ситимигэр түмсүүлээхпит, эти-хааны эрчийии араас көрүҥүн, дьарыгын барытын сэргээн көрөбүт, төһө кыалларынан бэйэбит дьарыктанабыт.

Биир санаалаахтарбытын кытта алтыһан элбэххэ үөрэнэбит. Дьокуускайтан Матвей Иванович Лыткины ыҥыран маастар-кылаас ыыппыппыт. Өссө элбэх киһи хаалык ылынна. Эдэрдиин-эмэнниин хаамыынан дьарыктанар буоллубут.

Елена Климовская:

• Хаардаах кыһыммын таптыыбын.