28.05.2020 | 18:00

"Кыһыл зона" үлэһиттэрэ

"Кыһыл зона" үлэһиттэрэ
Ааптар: Киин Куорат
Бөлөххө киир

Прасковья Константиновна Ефремова – Дьокуускайдааҕы клиническэй балыыһа Лучевой диагностика салаатын старшай лаборана, Доруобуйа харыстабылын туйгуна:

– Биһиги “Отделение лучевой диагностики” диэн салааҕа компьютернай томографияҕа 5 лаборант, 2 санитарка буолан “кыһыл зонаҕа” үлэлиибит. Быраастарбыт биһигиттэн тэйиччи олорон үлэлииллэр.

Бары дьоммутуттан тэйбиппит үһүс ыйыгар баран эрэр. Холобур, лабораннар Мир Иннокентьевич Ефремов үс оҕолоох, Иван Яковлевич Аввакумов биир оҕолоох, мин үс сиэннээхпин, Спиридон Николаевич Ларионов, Николаҋ Николаевич Спиридонов, икки санитаркаларбыт буолан бииргэ тутуспутунан үлэлии сылдьабыт. 4 эдэр специалиһы салайан илдьэ сылдьабын.

Кулун тутар 13 чыыһылатыттан, бастакы ыарыһахтар кэлиэхтэриттэн ыла үлэлиибит.

Биһигини кытта сэбиэдиссэйбит  Юлия Семеновна Никифорова, быраастарбыт Дмитрий Вячеславович Григорьев, Туйаара Тарасовна Спиридонова, Любовь Ивановна Маппырова, Аэлита Валентиновна Потапова, Андрей Андреевич Семенов үлэлииллэр.

 Суукканы төгүрүччү быыстала суох үлэбитигэр баарбыт. Күнүскү симиэнэ 4 чааска диэри буолар, түүҥҥү – түүн 4 чаастан сарсыарда 8 чааска диэри.

Ыарыһах кэлэрэ наһаа элбэх. Сууккаҕа 40-50 коронавирустаах киһи кэлэр. Инфекционнай балыыһалар, обсерватордар, оҕо инфекционкалара бары биһигинэн ыарыһахтарын аһардаллар. Сарсыарда 6 чаастан саҕалаан ыарыһахтар кэлэн бараллар. Ону таһынан, тастан ыалдьан  киирэр бары ыарыһахтары компьютернай томографиянан хайаан да аһараллар. Коронавирус инфекцията, көннөрү пневмонияттан уратыта диэн, боростуой рентгеҥҥэ көстүбэт, ол иһин хас биирдии ыалдьыбыт киһи компьютернай томографияны ааһар. Биһиги быраастарбыт сиһилии ойуулаан суруйдахтарына эрэ, диагнозтара бигэргэтиини ааста диэн буолар.

Холобур, биир ыарыһах инфекционнай корпуска ыалдьан киирэригэр КТ түһэрэбит. Онтон ол ыарыһах “в динамике” көрүллэр. Туруга тупсан иһэрин дуу, мөлтүүрүн дуу кэтииллэр. 10-чалыы хоно-хоно, нэдиэлэ буола-буола биһиэхэ иккистээн, үһүстээн аҕалаллар. Ол иһин көрөр дьоммут ахсаана элбэх буолар.

Ыарахан туруктаах дьону киһи этэ да барбат, Реанимация отделениетыгар үөһээ этээстэргэ сыталлар. Онтон түһэр ыарыһахтар өйө суох, тыынар аппаракка холбоно сытаахтыыр буолаллар.

Биһиги ыарыһахтары кытта ыкса алтыһар дьон ахсааныгар киирэбит. Ол иһин кулун тутар бүтүүтэ “Лена” гостиницаҕа изоляцияҕа киллэрбиттэрэ. Кэнники 2 санитаркабытын “Стерх” гостиницаҕа олохтообуппут. Онтон сылдьан үлэлиибит. Гостиница усулуобуйата үчүгэй, минньигэстик, тотоойутук аһаталлар. Үлэбитигэр сылдьар кэммитигэр волонтердар сылаас ас аҕалаллар. Эбиэккэ биирдэ уонна түүн хонор дьоҥҥо биирдэ итии ас кэлэр.

Үлэлиир усулуобуйабыт олус ыарахан. Бу көстүүмнэрбитин кэтэн баран, 4-6 чаас “кыһыл зонаттан” тахсыбаппыт. Сылайыы, тиритии-хорутуу барыта баар.

Кыһыл линия анараа өттүгэр үлэлиир дьон  буоламмыт, ааммыт икки өттүттэн хатааһыннаах. Ыарыһахтары кытта кэпсэтэр бириэмэбит да суох. Ааттарын-суолларын быраастар төлөпүөнүнэн этэллэр, чинчийии оҥоро-оҥоро салгыы ыытан иһэбит.

Балыыһабыт 5 этээһэ бүтүннүү коронавирустаах ыарыһахтар сытар сирдэрэ буолла. Кыра эһээхэй оҕолортон саҕалаан, бүтүн дьиэ кэргэнинэн сытар дьон бааллар. Кыра оҕолорго чинчийии барыта наркозтаах ыытыллар – реанимационнай биригээдэ кэлэн үлэлиир. Кэнники кэмҥэ оҕо, ыччат киирэрэ элбээтэ. Чинчийиини ааһар дьон ахсаана күн-түүн эбиллэ турар.

Бу ыарыыга араас атын хроническай ыарыылаах, холобур, сахарнай диабеттаах, сүрэх, быар, тыҥа ыарыылаах дьон улаханнык оҕустараллар. Информация барыта иһиллэ турар кэмэ, ыарыы хайдах сыстарын дьон бары билэр буолуохтаах. Биһиги бары дьиэ кэргэммититтэн арахсан, чугас дьоммутуттан тэйэн сылдьабыт – ол ыарахан соҕус.

Бар дьоҥҥо тиэрдиэхпит этэ: биһиги үлэбит ыараханын, ыарыы дьиҥнээхтии олус кутталлааҕын, баһаалыста, өйдөөҥ! Биһиги эһиги тускутугар үлэбитигэр хаалбыппыт, эһиги биһиги туспутугар дьиэҕитигэр олоруҥ!

Сонуннар

Ордук ааҕаллар

Дрону күрдьэҕинэн суулларбыт саха буойуна
Дьон | 16.05.2024 | 14:00
Дрону күрдьэҕинэн суулларбыт саха буойуна
Нэдиэлэ аайы саҥаттан саҥа киһини билсэр, салгыы кинини кытта сибээһи тутар, суруйсар суруналыыс идэлээх киһи үлэтин биир эмиэ интэриэһинэй өрүтэ. Мин анал байыаннай дьайыыга сылдьар суруйбут, ааҕааччы киэҥ эйгэтигэр таһаарбыт уолаттарбын үгүстэрин билсэбин, ыйыталаһабын, ханна тиийбиттэрин, сылдьалларын сураһабын, хомойуох иһин, сорохторун сүтэрэбин...   Хачыгаардыы сылдьан бэбиэскэ туппутум Анал байыаннай дьайыыга мобилизация...
Татьяна Иванова:  «Дьол уйатын ытыктабыллаах сыһыан эрэ тутар»
Дьон | 16.05.2024 | 16:00
Татьяна Иванова: «Дьол уйатын ытыктабыллаах сыһыан эрэ тутар»
Арассыыйаҕа Дьиэ кэргэн сылынан уонна Дьиэ кэргэн аан дойдутааҕы күнүгэр сөп түбэһиннэрэн, таптал кыымыттан саҕыллан биэс уон биэс сыл бииргэ олоруу дьолун билбит Татьяна, Петр Ивановтар дьиэ кэргэн туһунан сырдатабын.   Киһи төрүүрүгэр олоҕо барыта үөһэттэн суруллан кэлэр ыйаахтаах, ол  сиэринэн оҕо, ыччат буола үүнэн, сирдээҕи тапталы көрсөн, ийэ, аҕа дьолун...
Дархан этээччи Валентин Хорунов:  «Саха оһуохайа аан дойду дьонун түмүөҕэ...»
Дьон | 23.05.2024 | 10:00
Дархан этээччи Валентин Хорунов: «Саха оһуохайа аан дойду дьонун түмүөҕэ...»
Былырыын балаҕан ыйын 7 күнүгэр Саха Өрөспүүбүлүкэтин Ил Дархана Айсен Николаев Оһуохай күнүн олохтуур туһунан Ыйаахха илии баттаабыта. Дьэ, ол үөрүүлээх күммүт – ыам ыйын 25 күнэ үүнэрэ икки хонук хаалла.  Бүгүҥҥү нүөмэрбит ытык-мааны ыалдьыта – Саха Өрөспүүбүлүкэтин Дархан этээччитэ Валентин Хорунов.   Дьуохар биһигэр улааппыт дьоллоохпун – Валентин Васильевич, саха...
Оҕуруотчут кистэлэҥнэрэ
Тускар туһан | 23.05.2024 | 18:00
Оҕуруотчут кистэлэҥнэрэ
Кылгас, ол эрээри өҥүрүк куйаас сайыннаах Сахабыт сиригэр эгэлгэ сибэккилэри, оҕуруот аһын арааһын үүннэрэн ылабыт. Сылтан сыл аайы соҕуруу дойдуга силигилии үүнэр сонун үүнээйилэр көрүҥнэрин олордон,  тиэргэммит, дьиэбит  кэрэ көстүүлэнэр, ону тэҥэ оҕуруот аһыттан, отонноох талахтартан кэнсиэрбэлэри, хомпуоттары оҥосторбут элбээтэ.    Бастыҥ тиэргэннээх  хаһаайка Мин бүгүн сайыҥҥы сырал күннэргэ ис сүрэхтэн...